Aqtaýda álsirep, usha almaı qalǵan eki aqqý qutqaryldy

AQTAÝ. KAZINFORM — Mańǵystaý oblystyq orman sharýashylyǵy jáne janýarlar dúnıesi aýmaqtyq ınspektsııasynyń habarlaýynsha, Aqtaýda qys mezgilinde qolaısyz aýa raıynyń saldarynan zardap shekken eki aqqý qutqarylyp, tabıǵı mekenine qaıtarylǵan.

— Álsirep, tońyp qalǵan qustar Aqtaý qalasyndaǵy áleýmettik beıimdeý ortalyǵyna jetkizilip, olarǵa alǵashqy kómek kórsetildi. Ústirt memlekettik tabıǵı qoryǵynyń tabıǵı keshender men nysandardy qorǵaý bóliminiń kezekshi memlekettik ınspektorlary qustardy qabyldap, olardy kútip-baǵýǵa arnalǵan qajetti sharalardy júrgizdi, — delingen habarlamada.

Aqqýlardyń jaǵdaıy jaqsarǵannan keıin olar 1-2 aqpan kúnderi Qaraqııa–Qarakól memlekettik tabıǵı qoryǵynyń aýmaǵynda ornalasqan Qarakól kóline jiberilgen.

Buǵan deıin, Jetisý oblysynda qamys arasynda qalyp qoıǵan aqqý qutqarylǵan edi.

Al, Pavlodarda aýyl turǵyndary Qyzyl kitapqa engen suńqyldaq aqqýdy qutqarǵany anyqtaldy.