AQSh-tyń saýda ókili Qazaqstanǵa keledi
ASTANA. Kazinform – AQSh-tyń Saýda ókili Ketrın Taı 11-12 maýsym kúnderi Tashkent pen Samarqandqa barady. Ol Ózbekstan prezıdentimen jáne basqa da resmı tulǵalarmen kezdesedi. Osydan keıin ol Astanada ótetin AQSh pen aımaq elderi arasyndaǵy Saýda jáne ınvestıtsııalyq kelisimniń otyrysyna qatysady.
AQSh-tyń saýda ókili Ketrın Taı Orta Azııaǵa saparyn áýeli Ózbekstannan bastaıdy. Bul týraly AQSh Saýda ókiliniń keńsesi (USTR) habarlady.
Sapardyń birinshi kúni Ketrın Taı prezıdent Shavkat Mırzıeevpen kezdesedi dep josparlanǵan. Ol, sondaı-aq, Prezıdenttiń kómekshisi Saıda Mırzıeevamen jáne birqatar úkimet ókilderimen kezdesedi.
AQSh Saýda ókili 12 maýsymda Samarqandqa barady. Onda ol oblys ákimimen kezdesip, qalanyń kórikti jerlerin aralaıdy.
Ketrın Taı 12-13 maýsym kúnderi Astanaǵa keledi jáne AQSh pen Ortalyq Azııa elderi arasyndaǵy Saýda jáne ınvestıtsııalyq negizdemelik kelisimniń (TIFA) otyrysyna qatysady dep josparlanýda. Taı Qazaqstan, Ózbekstan, Qyrǵyz Respýblıkasy, Tájikstan jáne Túrkimenstannyń resmı ókilderimen AQSh-Ortalyq Azııa saýda jáne ınvestıtsııalyq negizdemelik kelisim (TIFA) keńesiniń otyrysyna teń tóraǵalyq etedi.
Sondaı-aq, ol Qazaqstannyń Premer-Mınıstriniń orynbasary Serik Jumanǵarınmen kezdesedi.
Juma kúni, 14 maýsymda Ketrın Taı Qazaqstan Prezıdenti Qasym-Jomart Toqaevpen kezdesýi josparlanǵan.
Sonymen qatar AQSh Saýda ókili Qazaqstannyń Saýda jáne ıntegratsııa mınıstrligi, Indýstrııa jáne Aýyl sharýashylyǵy mınıstrligi ókilderimen de kezdesedi.
Ketrın Taı - Saýda jónindegi palata komıtetiniń advokaty jáne bas saýda keńesshisi. Ony AQSh-tyń saýda ókili qyzmetine prezıdent Djo Baıden usynǵan.
AQSh Saýda ókili syrtqy saýda saıasatyn úılestirýge, saýda zańdaryn ázirleýge, ekijaqty jáne kópjaqty saýda kelisimderin ázirleýge jaýapty memlekettik qyzmetker. Ol AQSh prezıdentiniń atqarýshy keńsesiniń bóligi bolyp tabylady.
