AQSh-ta Binance iri krıptobırjasynyń negizin qalaýshy sottaldy

ASTANA. KAZINFORM – Dáýleti 33 mlrd dollarǵa baǵalanǵan álemdegi eń baı adamdardyń biri Chanpen Chjao sottaldy. AQSh soty ony tórt aıǵa bas bostandyǵynan aıyrý týraly úkim shyǵardy. Bul týraly DW aqparat agenttigi jazdy. 

Álemdegi eń iri Binance krıptovalıýta bırjasynyń negizin qalaýshy, 47 jastaǵy qarjy magnaty AQSh-tyń aqshanyń izin jasyrý qarsy zańyn buzǵany úshin kináli dep tanyldy.

Aıyptaý tarapynyń nusqasy boıynsha, Binance basshylyǵy terrorızmdi, balalar pornografııasyn jáne basqa da zańsyz áreketterdi qarjylandyrýǵa qatysty tranzaktsııalardan habardar bolǵan, biraq platforma bul týraly quqyq qorǵaý organdaryna habarlamaǵan. Chjao kinásin moıyndap, Binance basshysy qyzmetinen ketti. 

Tórt aı túrmede otyrǵanynan bólek Chjao 50 myń dollar aıyppul tóleýi tıis. 

Chjao – álemdegi eń baı adamdardyń biri. Onyń baılyǵy 33 mlrd dollardy quraıdy. Ol Forbes jýrnalynyń keıingi jyl saıynǵy mıllıarderler tiziminde 50-orynda tur.

Naýryzda AQSh soty bankrotqa ushyraǵan FTX krıptobırjasynyń negizin qalaýshy Sem Benkman-Frıdti 25 jylǵa bas bostandyǵynan aıyrdy. Bankrottyqqa deıin bul bırja Binance krıptovalıýta bırjasynyń negizgi básekelesteriniń biri bolǵan edi. Benkman-Frıd klıentterdiń aqshasyn urlaǵany úshin kináli dep tanyldy.