AQSh Somalıdegi lańkesterge birneshe soqqy jasady

ASTANA. KAZINFORM – AQSh Qarýly kúshteri Afrıka qolbasshylyǵynyń (AFRICOM) málimetinshe, amerıkalyq ásker Somalıde «Ash-Shabab» pen «Islam memleketiniń» (Qazaqstanda tyıym salynǵan uıym – red.) jergilikti fılıalyna qarsy áýe shabýyldaryn kúsheıtti, dep habarlaıdy FOX News. 

AFRICOM málimdemesinde AQSh kúshteri Somalıdiń federaldy úkimetimen lańkestikke qarsy keshendi naýqan aıasynda yntymaqtasqyp jatqany aıtylǵan. 
8 qańtarda áýe shabýyldary «Ash-Shabab» pozıtsııalaryna, sonyń ishinde Somalı astanasy Mogadıshodan soltústik-batysqa qaraı shamamen 154 shaqyrym jerde ornalasqan Býýr-Heıbe aýdanyna jasalǵan.

9 jáne 11 qańtar kúnderi «Islam memleketiniń» Pýntlend avtonomııalyq aýdany Golıs taýlary aımaǵynda jáne Barı provıntsııasyndaǵy Bosaso qalasynan ońtústik-shyǵysqa qaraı ornalasqan pozıtsııalaryna áýeden soqqylar jasaldy. 

- Biz «Islam memleketi» men «Ál-Kaıda» keńeıe berse, AQSh-qa tikeleı qaýip tóndiretinin jaqsy túsinip otyrmyz, - dep málimdedi AQSh Qarýly kúshteri afrıkalyq qolbasshylyǵynyń basshysy general Maıkl Lenglı.

AFRICOM málimetinshe, AQSh 2025 jyldyń 1 aqpany men 10 maýsymy aralyǵynda Somalıdegi «Ash-Shabab» jáne «Islam memleketine» qarsy áýeden 38 shabýyl jasady. 

«Ash-Shabab» - «Ál-Kaıdanyń» (Qazaqstanda tyıym salynǵan uıym – red.) fılıaly jáne 2007 jyldan beri eldiń ońtústik jáne ortalyq bólikterinde Somalı úkimetine qarsy soǵys júrgizip keledi.

«Islam memleketi» - negizinen Pýntlendtiń taýly soltústik-shyǵysynda shoǵyrlanǵan shaǵyn top, ol sonymen qatar yqpal etý úshin «Ash-Shababpen» básekelesip otyr. 

Buǵan deıin EO Somalıdiń egemendigin qurmetteýge shaqyrǵanyn jazǵan edik.