AQSh Parıj klımattyq kelisiminen resmı túrde shyqty
ASTANA. KAZINFORM — Parıj klımattyq kelisiminen shyǵý týraly sheshim 27 qańtarda kúshine endi, dep habarlaıdy DW.
Bul Donald Tramp ákimshiliginiń BUU-ǵa tıisti habarlama jibergeninen keıin týra bir jyl ótken soń júzege asty.
Osylaısha AQSh jahandyq jylynýdy shekteý jónindegi mindettemelermen ózin budan bylaı baılanysty dep sanamaıdy.
AQSh-tyń Parıj klımattyq kelisiminen resmı túrde shyǵýy prezıdent Donald Tramp ákimshiliginiń klımattyń ózgerýine qarsy halyqaralyq kúsh-jigerden bas tartqanyn túbegeıli bekitti.
BUU-nyń Klımattyń ózgerýi jónindegi negizdemelik konventsııasy hatshylyǵynyń habarlaýynsha, shyǵý týraly sheshim seısenbi, 27 qańtarda Amerıka Qurama Shtattary bul jóninde Birikken Ulttar Uıymyna resmı túrde habarlaǵan kúnnen týra bir jyl ótkende kúshine endi.
Tramp Parıj kelisiminen shyǵý týraly jarlyqqa 2025 jylǵy qańtarda óziniń jańa ınaýgýratsııasy ótken kúni qol qoıǵan.
Parıj kelisimi jahandyq jylynýdy tejeýge jáne klımattyń ózgerýiniń eń joıqyn saldarynyń aldyn alýǵa baǵyttalǵan.
Halyqaralyq klımat saıasatyna yqpaly
AQSh-tyń kelisimnen shyǵýy bul eldiń parnıktik gazdar shyǵaryndylaryn qysqartý jónindegi mindettemelermen ózin endi baılanysty dep eseptemeıtinin bildiredi. Sondaı-aq amerıkalyq delegatsııa halyqaralyq klımattyq konferentsııalarǵa qatysýdy toqtatady. Budan bólek, AQSh-tyń shyǵýy klımattyq beıimdelý men jahandyq jylynýdyń saldarlarynan qorǵanýǵa baǵyttalǵan eń kedeı elderge kórsetiletin qarjylyq kómektiń aıtarlyqtaı qysqarýyna alyp keledi.
AQSh Qytaıdan keıingi álemdegi parnıktik gazdar shyǵaryndylarynyń ekinshi iri kózi. BUU baǵalaýy boıynsha, qazirgi jahandyq klımattyq saıasat saqtalǵan jaǵdaıda, ǵasyr sońyna qaraı Jerdegi ortasha temperatýra ındýstrııaǵa deıingi deńgeımen salystyrǵanda shamamen 2,8 gradýsqa kóteriledi. AQSh-tyń kelisimnen shyǵýy bul kórsetkishti shamamen 0,1 gradýsqa arttyrady.
Greenpeace Deutschland uıymynyń basshysy Martın Kaızer Donald Tramptyń bul sheshimin halyqaralyq quqyqtyq tártipke qarsy «geosaıası órt qoıý» dep atap, onyń munaı-gaz salasynyń múddelerine qyzmet etetinin málimdedi.
Onyń aıtýynsha, Eýropa mundaı jaǵdaıda eseńgirep qalmaı, klımattyq saıasatty jalǵastyrý úshin jańa odaqtar qurýy tıis. Klımatty qorǵaý baǵytynan bas tartý, Kaızerdiń pikirinshe, «múlde qate reaktsııa» ári «Tramptyń aldynda tize búgý» bolar edi.
AQSh-tyń kelisimnen ekinshi ret shyǵýy
Bul Donald Tramp tusynda AQSh-tyń Parıj kelisiminen ekinshi ret shyǵýy. Onyń alǵashqy prezıdenttik merzimi kezinde de Amerıka Qurama Shtattary kelisimnen shyqqan bolatyn, alaıda Djo Baıden ákimshiligi kezinde el qaıtadan oǵan qosyldy.
Buǵan deıin bıyl Tramp ákimshiligi BUU-nyń Klımattyń ózgerýi jónindegi negizdemelik konventsııasynan da shyǵý jáne Klımattyń ózgerýi jónindegi úkimetaralyq sarapshylar tobynyń (IPCC) jumysyna qatysýdy toqtatý nıeti baryn málimdegen edi.