AQSh elshisi qazaqstandyqtardy erekshe quttyqtady

AQSh-tyń Qazaqstandaǵy elshiligi Facebook jelisinde vıdeoquttyqtaý jarııalady. AQSh elshisi Denıel Rozenblıým Qazaqstan astanasyn aralap, qazaqtyń birtýar tulǵalary týraly áńgimeledi, dep habarlaıdy Kazinform. 

— Osydan 33 jyl buryn Qazaqstan egemendigin jarııalap, táýelsizdik pen jarqyn bolashaqtyń dańǵyl jolyna tústi. Osyǵan oraı men osy egemendiktiń negizin qalaǵan Qazaqstannyń uly erleri men áıelderin zerttep kóreıin dedim. Olardyń esimi qazir kúndelikti ómirimizde jıi aıtylyp, kóshe mańdaıshalarynda, eskertkishte jazýly tur. Qalany aralap, osy uly tulǵalardyń egemen, táýelsiz jáne zamanaýı Qazaqstandy qurýǵa qosqan úlesin eske alaıyq, — deıdi vıdeoda Denıel Rozenblıým.

Elshi Mirjaqyp Dýlatov, Shara Jıenqulova, Muhtar Áýezov, Aqyn Sara jáne Rahymjan Qoshqarbaev kóshelerine toqtap, birtýar tulǵalardyń qazaq halqynyń tarıhyna qosqan úlesi týraly áńgimeledi.

— Osy Respýblıka kúninde Qazaqstan táýelsizdikke alǵashqy qadamyn toılap jatqanda men Astanadaǵy qazaq jáne amerıkan halyqtarynyń qarym-qatynasyn aıqyndaıtyn taǵy bir kósheni atap ótkim keledi, ol — Dostyq. Barshańyzǵa Respýblıka kúni qutty bolsyn, - deıdi Qazaqstandaǵy AQSh elshisi.