Aqmolalyq turǵynnyń úıinen 5 keliden astam marıhýana tabyldy

ASTANA. KAZINFORM – Aqmola oblysynyń turǵyny óz úıinde 5 keliden astam marıhýana saqtaǵan. Endi quqyq qorǵaý organdary esirtkiniń shyǵý tegi men onyń qandaı maqsatta saqtalǵanyn anyqtaýy tıis.

Aqparatty Aqmola oblysynyń polıtsııa departamenti baspasóz qyzmeti taratty. Vedomstvo málimetinshe, jedel-izdestirý sharalary barysynda tyıym salynǵan zattardy saqtady degen kúdikpen Jaqsy aýylynyń 34 jastaǵy turǵyny anyqtalǵan.

– Kúdiktiniń turǵylyqty mekenjaıyn tintý kezinde polıtseıler ósimdik tektes esirtki zatyn – marıhýanany taýyp, tárkiledi. Tárkilengen zattyń jalpy salmaǵy 5,6 kelini qurady. Qoldanystaǵy zańnamaǵa sáıkes, bul asa iri mólsherge jatady. Atalǵan derek boıynsha sotqa deıingi tergep-tekserý bastaldy, – dep habarlady departamentten.

Qazirgi ýaqytta polıtseıler oqıǵanyń barlyq mán-jaıyn anyqtaýǵa baǵyttalǵan qajetti tergeý áreketterin júrgizip jatyr. Tıisti saraptamalar taǵaıyndalyp, esirtki zatynyń shyǵý tegi anyqtalýda.

Sonymen qatar, kúdiktiniń mundaı kólemdegi esirtkini qandaı maqsatta saqtaǵany jáne onyń aınalymyna qatysy bolýy múmkin ózge adamdar men jetkizý arnalary tekserilip jatyr.

Aıta keteıik, buǵan deıin Aqmola oblysynda zańsyz fıtozerthana anyqtalǵany habarlanǵan.