Aqmolada erekshe fotokórme uıymdastyryldy
KÓKShETAÝ. KAZINFORM – Aqmolada «Zań jáne tártip» qaǵıdatyn júzege asyrý aıasynda erekshe fotokórme uıymdastyryldy, - dep jazdy Polisia.kz.
Onyń maqsaty – polıtsııa qyzmetkerleriniń kúndelikti eńbegin jurtshylyqqa tanystyryp, quqyqtyq tártip pen qoǵamdyq qaýipsizdikti qamtamasyz etýdegi olardyń mańyzdy rólin aıshyqtaý.
Ekspozıtsııa túrli polıtsııa bólimsheleriniń jumys erekshelikterin keńinen ashyp kórsetedi. Kórermender naqty qyzmettik jaǵdaılarda túsirilgen fotosýretterdi tamashalaı alady: jedel jáne patrýldik qyzmet, kınologtar men ıývenaldy polıtsııa, sondaı-aq arnaıy jasaqtyń jumysy. Árbir sýret – qajyrly eńbek pen jaýapkershiliktiń aıqyn kórinisi.
Kórmege «Jas Saqshy» polıtsııa synyptarynyń oqýshylary da belsene atsalysty. Olar kelýshilerge usynylǵan materıaldar jóninde áńgimelep, jastardy quqyq qorǵaý organdarynyń qyzmetimen jaqynyraq tanystyrýǵa yqpal etti.
– Búgingi is-shara arqyly biz jas býyndy ishki ister organdaryndaǵy qyzmettiń mán-mańyzy týraly keńinen aqparattandyryp, olardy osy abyroıly mamandyqty tańdaýǵa yntalandyrýdy kózdep otyrmyz, – dedi Aqmola oblysy PD jeke qurammen jumys basqarmasynyń bastyǵy Ǵalymjan Sadyqov.
30-dan astam jumystan quralǵan bul fotokórme polıtseılerdiń qyzmet kúnderin beıneleýmen qatar, qoǵamda senim uıalatyp, azamattar men tártip saqshylary arasyndaǵy baılanysty nyǵaıta túsedi.
Buǵan deıin Semeıde polıtsııa kórmesi uıymdastyrylǵanyn jazǵan bolatynbyz.