Aqmola oblysynyń bıýdjeti aıqyndaldy

KÓKShETAÝ. QazAqparat - Búgin Aqmola oblysynyń ákimi Málik Myrzalınniń qatysýymen oblystyq máslıhattyń toǵyzynshy sessııasy ótti, dep habarlaıdy «QazAqparat» HAA tilshisi.

Sessııa barysynda mańyzdy 30 másele qaraldy. Onyń ishinde depýtattar óńirdegi áleýmettik basty máselelerdi sheshý úshin  2017-2019 jyldarǵa arnalǵan  oblystyq bıýdjetti aıqyndady.

Bıýdjettiń jyl basynan beri ıgerilmeı qalǵan qaldyq aqshasy 2016-2017 jylǵy jylý berý maýsymyn oıdaǵydaı aıaqtaýǵa jáne aldaǵy jańa maýsymǵa daıyndyq jumystaryn júrgizýge beriletin bolady.
 

Jańa bıýdjette áleýmettik, turǵyn úı nysandaryn, ınjenerlik ınfraqurylymdardy salý jáne qalpyna keltirý sııaqty ınvestıtsııalyq jobalardy júzege asyrý qarastyrylǵan. Oǵan qosa, mınıstrlikterdiń salalary boıynsha jobalardy anyqtap, júzege asyrý úshin jobalyq-smetalyq qujattamalardy ázirleý sharalaryna da bıýdjet qarjysy qarastyrylǵan.

Sessııada aımaq basshysy ózine senim bildirgen depýtattarǵa alǵysyn bildire kele, ár máselelege konstrýktıvti sheshim qabyldanǵanyn atap ótti.

«Jaqynda oblys aktıvimen kezdesken Elbasy aýyl sharýashylyǵy, týrızm, shaǵyn jáne orta bıznesti damytý jóninde mindetter qoıǵan bolatyn. Aqmola oblysy turǵyndardyń ál-aýqatyn kóterýde óńirdiń áleýeti joǵary», - dep sózin qorytyndylady oblys ákimi.