Aqmola oblysynyń agrotehnıkasy kóktemgi egiske daıyn

KÓKShETAÝ. QazAqparat – Bıyl Aqmola oblysynyń dıqandary 5,1 mıllıon gektar jerge tuqym sebýdi josparlap otyr. Osy rette aımaqta naýqandy belgilengen kestege saı júrgizý úshin aýyl sharýashylyǵy tehnıkalarynyń daıyndyǵyna kóńil bólinýde, dep habarlaıdy QazAqparat tilshisi.

Oblystyq Aýyl sharýashylyǵy jáne jer qatynastary basqarmasynyń málimetinshe, bıyl tuqym sebý naýqanyna 14 myńnan astam traktor, 18 myńnan astam astyq sepkish jáne 1406 ónimdiligi joǵary egis kesheni jumyldyrylatyn bolady. Qazirgi kezde óńirde kóktemgi dala jumystaryn júrgizý úshin qajetti aýyl sharýashylyǵy tehnıkalary 100 paıyz daıyn.

Basqarma basshysynyń orynbasary Qasym Itkusovtyń aıtýynsha, zamanaýı tehnıkany qoldaný egis sapasyn qamtamasyz etýge, aýyl sharýashylyǵy óndirisine naqtyly eginshilik elementterin engizýge jáne jańǵyrtý úshin negiz jasaýǵa múmkindik beredi.

«Jumys josparyna sáıkes oblysta 20 jumys kúni ishinde dándi daqyldardy egý josparlanǵan. Egistegi ortasha táýliktik ónimdilik keminde 230 myń gektardy quraýy tıis. Bul rette egis keshenderimen eginniń 65 paıyzǵa jýyǵy egiletin bolady», - dedi Qasym Itkusov.

Memlekettik qoldaý sharalarynyń arqasynda kásipkerlerdiń sýbsıdııalaý kózderi boıynsha joǵary tehnologııalyq jabdyqtardy satyp alý múmkindigi bar.

Zerendi aýdanyndaǵy sharýa qojalyǵynyń dırektory Anatolıı Strekozın memlekettik qoldaýdy paıdalanyp, tehnıka parkin jańartýda.

«Ótken jyly lızıngige eki traktor men eki egis keshenin satyp aldyq. Bıyl traktor men egis keshenin satyp alamyz. Bul biz úshin óte tıimdi jáne paıdaly», - deıdi kásipker.

Aıta ketsek, Aqmola oblysynda jyl basynan beri 229 tehnıka – 65 traktor, 48 kombaın, 22 egis kesheni jáne 94 ózge de tehnıka satyp alyndy. Al úsh jyl ishinde oblystyń aýylsharýashylyq tehnıkalary 1288 traktor, 1029 kombaın, 248 egis keshenine jańartylǵan.