Aqmola oblysynyń dıqandary kúzdik bıdaı orýdy bastady

KÓKShETAÝ. KAZINFORM – Óńirde bıdaı jınaý jumystary bastaldy. Kúzdik bıdaıdyń alǵashqy ónimi «Zerenda Saqtaý Ónimderi» JShS alqaptarynan kelip túsip jatyr. Bul týraly Aýyl sharýashylyǵy mınıstrligi habarlady.

Munda egin jınaý qarqyndy júrgizilýde. Ónimdilik gektaryna 30–32 tsentnerdi qurady.

– Kúzdik bıdaıdy byltyr qyrkúıek aıynda «Ýmka» surpymen sepken bolatynbyz, barlyq qajetti tyńaıtqyshtardy engizdik. Qazir alqap tolyq pisip, orý jumystary belsendi júrip jatyr, – dedi «Zerenda Saqtaý Ónimderi» JShS dırektory.

Erte pisetin bıdaıdy ósirýde qoldanylatyn ǵylymı tehnologııalardyń arqasynda jaqsy ónim alynady. Osy ádisti oblysta keńinen engizý josparlanyp otyr.

Óńirde egis alqaptaryn ártaraptandyrýǵa basymdyq berilip, maıly jáne mal azyqtyq daqyldar kólemi artyp keledi.

Bıylǵy kóktemgi egis kólemi – 5,5 mln gektar. Dándi daqyldardy jappaı orý 25 tamyzdan keıin bastalady.

Aıta keteıik, bıyl aýyl sharýashylyǵy taýar óndirýshileri aıtarlyqtaı memlekettik qoldaýǵa ıe boldy. «Keń Dala» baǵdarlamasy aıasynda 870 fermer 103,5 mlrd teńgeden astam somaǵa jeńildetilgen nesıe aldy. Jeńildetilgen lızıng baǵdarlamasy boıynsha jyl basynan beri aqmolalyq agrarshylar 31 mlrd teńgege 587 birlik aýyl sharýashylyǵy tehnıkasyn satyp aldy.

Jalpy, bıyl oblystyń agroónerkásiptik keshenin damytýǵa 227 mlrd teńgeden astam qarjy baǵyttaldy.

Aıta keteıik, eki jylda eldegi bıdaı alqaptary 750 myń gektar kemigen.