Aqmola oblysyndaǵy birqatar eldi mekendi sý basý qaýpi bar - senator
ASTANA. KAZINFORM – Ásirese, Astrahan aýdanyndaǵy aýyldarǵa qaýip tónip tur. Bul jóninde QR Parlamenti Senatynyń depýtaty Nurlan Bekenov Senattyń jalpy otyrysynda Premer-mınıstr Oljas Bektenovke joldaǵan depýtattyq saýalynda málimdedi.
– Qazaqstandaǵy 1242 eldi meken sý basý qaýpi bar aımaqta ornalasqan. Ásirese, birneshe óńirde kóktemgi sý tasqyny qateri joǵary. Aqmola oblysyndaǵy Astrahan aýdany da osy qatarda. Sońǵy birneshe jylda onda 190 úıdi sý alǵan, – dedi ol.
Atalǵan aýdandaǵy eldi mekenderdi sý basýynyń aldyn alý úshin «Demeý Qazaqstan qorynyń» esebinen Qalqutan ózeniniń arnasy tazartylǵan. Naqtyraq aıtqanda, 3,6 shaqyrym aýmaqta osyndaı jumystar júrgizilgen.
– Atqarylǵan jumystarǵa qaramastan, sý basý qaýpi áli de joǵary deńgeıde. Qaterli aımaqtaǵy eldi mekender – Eski Qalqutan aýylynda 702 adam, Eńbek aýylynda 85 kisi, al Qalqutan beketinde 700 azamat turady, – dedi senator.
Depýtattyń sózinshe, Qalqutan ózeniniń túbin tereńdetý, arnasyn tazartý jáne keńeıtý boıynsha joba daıyndalyp, oǵan sarapshylardyń oń qorytyndysy berilgen.
– Jobanyń jalpy quny – 5,2 mlrd teńge. 21 shaqyrymnan astam aýmaqta atalǵan jumystardy júrgizý qarastyrylǵan. Osy jobanyń arqasynda aýdan turǵyndarynyń qaýipsizdigin qamtamasyz etýge jáne áleýmettik nysandardy, ınjenerlik ınfraqurylymdy, egistik alqaptaryn, sýmen qamtý kózderin saqtap qalýǵa bolady, – dedi ol.
Nurlan Bekenovtyń málimdeýinshe, «Demeý Qazaqstan qorynan» 140 mln teńge bólingen. Endi jumystardy tolyq aıaqtaý úshin áli de 5 mlrd teńge kerek. Senator Úkimet basshysynan qosymsha qarajat bólý máselesin sheshýdi surady.
Aıta keteıik, buǵan deıin SQO-da sý basýy múmkin eldi mekenderdi qorǵaýǵa 105 shaqyrymdyq 60 bóget salynǵanyn jazǵanbyz.
