Aqmola oblysynda 100-den astam úıdi sý basty
KÓKShETAÝ. KAZINFORM — Aqmola oblysynyń birqatar eldimekenderinde sý tasqyny bolyp, 100-den astam túrǵyn úıdi sý basyp qaldy.
Aqmola oblysy TJD baspasóz qyzmetiniń málimetinshe, Atbasar aýdanynda Jabaı ózeninde sý deńgeıi kóterilip, 100-den astam úı men mektepti sý basyp qalǵan.
Sonymen birge, 200-ge jýyq úı men 2 mektep sý basý qaýpinde tur.
«Qazirge kezde qaýipti aımaqtaǵy úılerdiń turǵyndaryn evakýatsııalaý, sondaı-aq áleýmettik nysandar men turǵyn úılerdi tasqyn sýdan qorǵaý boıynsha is-sharalar júrgizilip jatyr. Sý basqan aýmaqtarda 400-den astam qutqarýshynyń jáne 100 tehnıkanyń kómegimen sý sorý jumysy qolǵa alynǵan», — dedi vedomstvodan.
Sonymen birge, óńirde erigen qar sýynyń molynan aǵýynan Jolboldy ózeni arnasynan tasyp, Ivankovka aýylynda 45 úıdi sý basty.
Avtomobıl qatynasy bolmaýyna baılanysty turǵyndardy evakýatsııalaýda qıyndyq týyndaǵan.
«Qorǵanys mınıstrliginiń MI-8 tikushaǵymen jáne Trekol arqyly jaqyn eldi mekenderge 52 adam, onyń ishinde 21 bala Makınsk qalasyndaǵy evakýatsııa pýnkti — № 4 mektep gımnazııasyna jetkizildi. Qutqarylǵandar medıtsınalyq kómekti qajet etpedi», — dep tolyqtyrdy vedomstvodan.
Budan bólek, atalmysh aýyldan 100 bas iri qara, 11 jylqy, 50 shoshqa jáne 520 úı qusy qaýipsiz jerge kóshirildi.
Aıta ketsek, budan buryn Atbasar aýdanynda sý tasqynyna baılanysty tótenshe jaǵdaı jarııalanǵanyn jazǵan edik.
