Aqmola oblysy sý tasqynymen qalaı kúresip jatyr

ASTANA. KAZINFORM – Aqmola oblysy TJD tótenshe jaǵdaılardyń aldyn alý basqarmasynyń bastyǵy Erden Berlibekov óńirde sý tasqynyna qarsy qandaı is-sharalar qolǵa alynǵanyn aıtyp berdi.

Qazirgi ýaqytta oblys aýmaǵynda sý tasqyny turaqty aýyr rejımde ótip jatyr. Kókshetaý qalasynda jergilikti aýqymdaǵy tótenshe jaǵdaı rejımi jarııalandy. 

Sondaı-aq, tasqyn qaýpi bolǵan Stepnogor qalasy, Birjan, Aqkól, Ereımentaý jáne Egindikól aýdandarynda jaǵdaı turaqtaldy. 

«Bul rette, Esil, Jarqaıyń, Shortandy, Tselınograd, Arshaly, Bulandy aýdandarynda sý tasqyny jaǵdaıy áli de kúrdeli bolyp otyr. Esil ózeni men onyń salalarynda – Atbasar, Sandyqtaý jáne Astrahan aýdandaryndaǵy Jabaı jáne Kolýton ózenderindegi erigen sý deńgeıiniń kóterilýinen eldi mekenderdi sý basý qaýpi saqtalady. Atalǵan óńirlerde sý tasqynyna qarsy is-sharalar, onyń ishinde muz jarý jumystary belsendi júrgizilýde. Bıyl 29 naýryzdan bastap 12 aýdanda sý tasqyny qaýpi bar 15 ózen ýchaskesinde 4 tonnadan astam jarylǵysh zat paıdalanyldy», - dedi E. Berlibekov ortalyq kommýnıkatsııalar qyzmetinde ótken baspasóz máslıhatynda. 

Onyń aıtýynsha, eldi mekenderdi qorǵaý úshin uzyndyǵy 32 shaqyrym úıindiler turǵyzylyp nyǵaıtyldy, 18 shaqyrym sý nysandarynyń jaǵalaý syzyǵy, 5 shaqyrym qorǵanys bógetteri salyndy.

2 mln tekshe metrden astam sý soryldy, ınertti materıal salynǵan 150 myńnan astam qapshyq tóseldi, 200 shaqyrymnan astam kanaldar men aryqtar tazartylyp, tereńdetildi jáne 1442 sý ótkizý qurylysy tazartyldy.

Apattyq-qutqarý jumysyna 1269 adam, 347 tehnıka, 16 qaıyq, 108 motopompa jumyldyryldy. 

Nátıjesinde 1225 adam evakýatsııalandy, onyń ishinde 269 bala bar.

Búgingi tańda evakýatsııalanǵan 1035 turǵyn úılerine oraldy.

18 myńnan astam mal ýaqytyly evakýatsııalandy, bul sý tasqyny kezeńinde olardyń ólimine jol bermedi.