Aqmola ákimi úzdik ustazdardy marapattady
Kókshetaýdaǵy Úkili Ybyraı atyndaǵy Aqmola oblystyq fılarmonııasynda uıymdastyrylǵan sharaǵa aımaq basshysy Málik Myrzalın, óskeleń urpaqqa bilim berý men tárbıeleýde joǵary nátıjege qol jetkizgen muǵalimder, pedagogıkalyq qyzmet ardagerleri, memlekettik organdar men úkimettik emes uıymdardyń ókilderi qatysty.
«Búgingi tańda memlekettik saıasattyń bilim berý salasy ýaqyt úrdisine saı, túbegeıli ózgeriske túsýde. Bıyl oblysymyzda alǵashqy ІT-mekteptiń iske qosylýy osy mindetterdi atqarýdaǵy qanatqaqty joba sanalady jáne bul úrdis únemi jalǵasa bermek», - deı kele, M.Myrzalın Memleket basshysynyń tapsyrmasyn, eldiń jańa dáýirdegi damý strategııasyn júzege asyrýǵa óńirde zor múmkindik pen myqty áleýet bar ekenin atap ótti.
Aımaq basshysynyń aıtýynsha, memlekettik qoldaý jyl saıyn ósip keledi. Oblysta júzden astam muǵalim - respýblıka boıynsha bilim salasynyń úzdigi, 86 ustaz - Y.Altynsarın atyndaǵy medaldiń ıegeri. Bıyl 264 oqýshy mektepti altyn medalmen aıaqtasa, daryndy órender pánder boıynsha halyqaralyq, respýblıkalyq, oblystyq olımpıadalarda 680 medal jeńip alǵan.
Saltanatty jıynda oblys ákimi M.Myrzalın aıryqsha kózge túsken muǵalimderge Y.Altynsaryn atyndaǵy medaldi tabys etse, zerendilik Jankeldi Ýáıisov, bulandylyq Beısenbi Yrysaldy, aqkóldik Oksana Vernıkova, sandyqtaýlyq Natalıa Ryjkova jáne basqalary Qazaqstan Respýblıkasynyń eńbek sińirgen bilim qyzmetkeri ataǵyna ıe boldy. Sondaı-aq, úzdik muǵalimderdiń bir toby oblys ákiminiń Alǵys hattarymen jáne aqshalaı syılyqtarmen marapattaldy.
Oblys basshysy orys tildi mektepter men kolledjderde qazaq tili páninen sabaq beretin muǵalimder arasyndaǵy oblystyq baıqaýdyń qorytyndysyn shyǵaryp, júldegerlerin marapattady. Qýanysh ıeleri qatarynda Býrabaı aýdanynyń ókili Damır Suraǵanov 600 myń teńgelik gran-prıdi jeńip alsa, baıqaýǵa Jaqsy aýdanynan qatysqan Jańagúl Alshynbaeva 400 myń teńge jáne Tselınograd aýdanyndaǵy Qosshy aýylynyń muǵalimi Kenjebaı Dándebaı 200 myń teńgelik syılyqty ıemdendi.
Sonymen qatar, jıynda Qazaqstan Respýblıkasynyń 2018 jylǵy «Úzdik pedagog» baıqaýynda jeńimpaz atanǵan aqmolalyq ustazdar - Kókshetaý qalasyndaǵy №3 daryndy balalarǵa arnalǵan mektep-ınternattyń hımııa pániniń joǵary sanatty muǵalimi Dana Manapova, oblys ortalyǵyndaǵy №1 mektep-gımnazııanyń fızıka pániniń muǵalimi Názıfa Zákirova, Şýche qalasyndaǵy ekologııa jáne orman sharýashylyǵy kolledjiniń oqytýshysy Natalıa Semkınanyń da esimderi ataldy.
