Aıda Balaeva Mádenıet mınıstrligine qatysty salalyq qandaı zańdarǵa túzetýler engiziletinin atady

ASTANA. KAZINFORM — Búgin Úkimet otyrysynda Premer-mınıstrdiń orynbasary — Mádenıet jáne aqparat mınıstri Aıda Balaeva qandaı zańnamalarǵa túzetýler engiziletinin atady.

— Ótken referendým el tarıhyndaǵy mańyzdy beleske aınaldy. Osylaısha, Memleket basshysynyń saıası júıeni jańǵyrtý baǵytyndaǵy bastamalary qoǵam tarapynan keń qoldaý tapty. Konstıtýtsııalyq ózgerister ádiletti qoǵam qurýǵa, bılik pen halyq arasyndaǵy ashyqtyqty arttyrýǵa jáne azamattyq belsendilikti kúsheıtýge jol ashty. Búginde memlekettik organdardyń aldynda turǵan basty mindet — konstıtýtsııalyq reformany júıeli ári úılesimdi túrde júzege asyrý. Sonymen qatar zańnamany jáne memlekettik saıasatty jańartylǵan konstıtýtsııalyq normalarǵa tolyq sáıkestendirý asa mańyzdy. Eń bastysy — Ata zańda aıqyndalǵan qundylyqtardy qoǵamda keńinen nasıhattap, olardy qoǵamdyq sananyń ajyramas bóligine aınaldyrý, — dedi vıtse-premer.

Onyń aıtýynsha, Mádenıet jáne aqparat mınıstrligine qarasty baǵyttarda salalyq zańnamany jańartý boıynsha birqatar jumystar júrip jatyr. Búginde mádenıet, aqparat, BAQ, arhıv isi, memlekettik rámizderdi paıdalaný, memleket pen azamattyq qoǵamnyń ózara baılanysy, din men jastar, otbasy saıasaty salalaryn retteıtin 20-dan astam zańnamalyq aktige ózgeris engizý josparlanyp otyr.

— Bul túzetýler negizgi konstıtýtsııalyq qaǵıdattardy iske asyrýǵa baǵyttalǵan. Atap aıtqanda, olar tarıhı-mádenı murany saqtaý, ulttyq mádenıetti qoldaý, otbasy ınstıtýtyn nyǵaıtý jáne azamattyq qoǵamdy damytý sııaqty mańyzdy baǵyttardy qamtıdy. Qazaqstannyń Halyq keńesi qurylýyna baılanysty qoǵamdyq kelisimdi nyǵaıtý jáne etnosaralyq qatynastardy damytý baǵytyndaǵy jumystar kúsheıtiletin bolady, — dedi Aıda Balaeva.

Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.