AES qurylysyna qatysty referendým: Qyrǵyzstanda daýys berý bastaldy
BІShKEK. KAZINFORM – Búgin Qazaqstanda atom elektr stansasyn salý boıynsha respýblıkalyq referendýmda daýys berý ótedi. Bishkekte Astana ýaqytymen tańǵy saǵat 6:00-de (jergilikti ýaqyt boıynsha 7:00) Qazaqstannyń Qyrǵyz Respýblıkasyndaǵy Elshiligi ǵımaratynda ornalasqan №396 saılaý ýchaskesi jumysyn bastady, dep habarlaıdy Kazinform agenttiginiń menshikti tilshisi.
Saılaý komıssııasynyń músheleri men qazaqstandyq dıplomattar referendým ótetin alańnyń saltanatty ashylý rásimin ótkizdi. Rásim Qazaqstan Respýblıkasynyń Ánuranymen bastaldy.
Elshiliktiń málimetinshe, saılaýshylar tiziminde jeke, resmı, bilim berý, iskerlik jáne týrıstik maqsatta Qyrǵyzstanda turatyn nemese elde júrgen 300 qazaqstandyq bar. Olardyń kópshiligi konsýldyq esepte turady.
Daýys berý saǵat 20.00-ge deıin jalǵasady. Odan keıin ýchaskelik komıssııa músheleri daýysty sanaýǵa kirisedi. Elimizdiń azamattary osy ýaqyt aralyǵynda konstıtýtsııalyq quqyǵyn júzege asyryp úlgere alady.
Daýys berýge kámelettik jasqa tolǵan qazaqstandyqtar qatysa alady. Ol úshin jeke basyn kýálandyratyn qujaty bolýy kerek.
Buǵan deıin Seýldegi referendýmda birinshi qazaqstandyq bolyp halyqaralyq uıym qyzmetkeri Kamıla Maýtova daýys bergenin jazǵan bolatynbyz.
