Ádilethan Moldahan 10 kúnge qamaýǵa alyndy — polıtsııa

ALMATY. KAZINFORM — Almaty polıtsııasy zańger ári bloger Ádilethan Moldahandy ustaý merzimine baılanysty túsinikteme berdi. 

Qalalyq polıtsııa departamenti sot qaýlysymen ol 10 táýlik merzimge qamaýda ustaý túrindegi bultartpaý sharasy qoldanylǵanyn atap ótti.

— Qazaqstan Respýblıkasy Qylmystyq-protsestik kodeksiniń 201-babyna sáıkes, tergeý múddesine oraı ózge aqparat jarııa etilmeıdi, — dep túsindirdi polıtsııadan.

Eske salaıyq, buǵan deıin Almatyda zańger ári bloger Ádilethan Moldahan ustalǵanyn jazǵanbyz.

Oǵan qatysty kórineý jalǵan aqparat taratý faktisi boıynsha sotqa deıingi tergep-tekserý jumystary júrgizilip jatyr.

Sondaı-aq búgin Almaty polıtsııasynyń burynǵy tergeýshisi qylmysty jasyrǵany úshin sottalǵany belgili boldy. Tergeýshi 14 qylmystyń jasalǵany týraly málimetter qolynda bola tura, olardy tirkeýdi qasaqana jasyryp, qylmystyq quqyq buzýshylyqtardy esepke alýdyń belgilengen tártibin buzǵan.