«Ádilet» partııasy áıelder men jastarǵa basymdyq berdi — Qarın
ASTANA. KAZINFORM — Prezıdent Ákimshiligi basshysynyń birinshi orynbasary Erlan Qarın «Ádilet» partııasynyń kezekten tys III sezine qatysyp, partııalyq tizimge engenin málimdedi.
— Keshe Astanada úlken mańyzdy oqıǵa boldy. «Ádilet» partııasynyń kezekten tys III sezi ótti. Onda partııanyń Saılaýaldy baǵdarlamasy men Quryltaı depýtattyǵyna kandıdattardyń partııalyq tizimi bekitildi. Basqa da mańyzdy máseleler qaraldy.
Men de atalǵan is-sharaǵa qatysyp, sezd sheshimimen partııalyq tizimge endim. Bul — úlken abyroı, sonymen qatar zor jaýapkershilik, — dep jazdy áleýmettik jelidegi paraqshasyna Erlan Qarın.
Osylaısha, «Ádilet» partııasy aldaǵy saılaýǵa Prezıdent reformalaryn jaqtap, jalǵastyratyn kandıdattardyń eń kóp quramymen qatysqaly otyr. Saılaýǵa túsetin 7 partııanyń ishinde eń kóp kandıdat usyndy — 186 adam.
— Bir ereksheligi, burynǵy jyldarmen salystyrǵanda tizimde áıelder men jastardyń sany aıtarlyqtaı kóp. Máselen, partııalyq tizimge engenderdiń 71-i — áıel. Al jastardyń úlesi — 26. Tek qana Prezıdenttik jastar kadr rezerviniń ózinen 15 ókil qosylǵan eken.
Partııalyq tizimde barlyq óńirdiń jáne túrli salanyń ókilderi tegis qamtylǵan. Jeke ózim úshin taǵy bir erekshe jaıt, kandıdattardyń qataryna burynǵy Ulttyq quryltaıdyń 31 múshesi engen eken. Barlyǵy da — qoǵamdaǵy belgili azamattar. Olarmen birge bes jyl boıy konsýltatıvtik-keńesshi organnyń qatarynda yntymaqtasa jumys istedik.
Osyndaı áriptestermen bir qatarda bolý — men úshin úlken mártebe.
Ózderińiz baıqaǵandaı, saıası ómirge áıelder men jastardyń qatysýy edáýir artyp keledi. Jańa tulǵalar men tyń esimder kelip jatyr. Munyń bári elimizde júrgizilip jatqan qoǵamdyq-saıası jańǵyrý úderisimen tolyq úndesedi, — dedi ol.
Aıta ketelik Quryltaı saılaýy 2026 jylǵy 23 tamyzda ótedi.
