Aden shyǵanaǵynda hýsıtter atqylaǵan keme sýǵa batty
ASTANA. KAZINFORM – Eki apta buryn ıemendik hýsıtterdiń zymyrandyq shabýylyna ushyraǵan Ulybrıtanııada tirkelgen Rubymar júk kemesi Aden shyǵanaǵynda sýǵa batty, dep habarlaıdy VVS.
Bul Iran qoldaýyna ıe bolǵan Iemen sodyrlary sýǵa batyrǵan alǵashqy keme. Olar Gazada soǵys bastalǵaly Izraılmen baılanysy bar dep (kóbine negizsiz) sanaǵan barlyq kemege oq jaýdyryp júr.
Júk kemesi ammıak selıtrasyn tasymaldaǵan. Sarapshylardyń pikirinshe, endi Aden shyǵanaǵy aımaǵynda jergilikti ekologııalyq apat bolýy múmkin.
19 aqpanda júk kemesine Bab-el-Mandeb buǵazynda eki zymyran soǵylyp, ol sýǵa bata bastaǵannan keıin 24 adamnan turatyn komanda Rubymar-dy tastap ketken.
Iemenniń halyqaralyq moıyndaǵan úkimetiniń premer-mınıstri Ahmed Avad ben Mýbarak júk kemesiniń batýyn «buryn-sońdy bolmaǵan ekologııalyq apat» dep atady, al Greenpeace uıymynyń ókilderi sýǵa túsken tyńaıtqyshtar teńiz ekojúıelerine aıtarlyqtaı zııan keltirýi múmkin ekenin atap ótti.
