Adamnyń bir qyzyǵy bala degen...
ASTANA. KAZINFORM - «Jibek joly» telearnasynan kórsetiletin «Ana bolǵym keledi» jobasynyń patsıentteri: jańaózendik – Aqbaıan 45 jasynda, Almaty oblysynyń turǵyny – Aıjan 42 jasynda ana atandy.
Bedeýlik pen belsizdik máselesi sońǵy jyldary qoǵamda jıi kezdesin, januıanyń tutastyǵyna áser etetin negizgi faktorǵa aınalyp úlgerdi. Bul máseleni «tabý» taqyrypqa jatqyzyp, jasyryp, sheshý jolyn qarastyrmaý – osy dıagnozǵa ushyraǵan jandardyń balaly bolý múmkindigin azaıta beredi. Densaýlyq jaǵdaıyna baılanysty tabıǵı jolmen balaly bola almaı júrgen otbasylardyń sońǵy úmiti – ekstrakorporaldy uryqtandyrý (EKO).
EKU kómegine birneshe márte júgingen, izdengen, eńbek etip, eń bastysy úmitin úzbegen juptardyń biri – Aqbaıan Tileýqulova men Saǵynbaı Qıbasov. Otaý qurǵandaryna 28 – jyl. Osy jyldar aralyǵynda birneshe márte EKU jasaǵan. Biraq bári sátsiz bolǵan. Ótken jyly «Ekomed» ortalyǵynyń reprodýktolog mamandary jańaózendik erli-zaıyptynyń ótinimimen tanysyp, «Ana bolǵym keledi» jobasynyń patsıentteri qataryna qabyldaǵan bolatyn.
Joba aıasynda ekinshi ret jasalǵan embrıon tasymaly sátti bolyp, Aqbaıan 28-sáýir kúni dúnıege ul balany alyp keldi. Esimin óz ájesi yrymdap – Tursynbek qoıdy. Salmaǵy – 2950 gr., boıy – 51 sm. bolyp týǵan Tursynbek pen anasynyń jaǵdaıy jaqsy. Sáýirdiń birinshi kúni perzenthanadan shyqty.
Jobanyń patsıentteri Aıjan Qasymbekova men Qanat Otarbaevtyń shańyraǵynda da kópten kútken qýanysh. On segiz jyl otasqan jup Aıala esimdi kishkentaı hanshaıymnyń ata-anasy atandy. Aıjan men Qanat sábıli bolý úshin alty ret EKU jasatqan. Sátsiz bolǵan. Dárigerler bul otbasylyq juptyń da oqıǵasymen tanysyp, joba patsıentteriniń qataryna qabyldady. Alǵashqy embrıon tasymaly sátti bolyp, 20-naýryz kúni Aıjan salmaǵy – 3 kg., boıy – 55 sm. deni saý qyz balany dúnıege alyp keldi. Ana men balanyń densaýlyǵy jaqsy, 25-naýryz kúni perzenthanadan shyqty.
Eki maýsymǵa jalǵasqan joba aıasynda búginge deıin 8 sábı dúnıege keldi, 9 kelinshektiń aıaǵy aýyr, 10 patsıent embrıon tasymalyna daıyndalýda.
Patsıentterdiń EKU shyǵynyna ketetin qarjyny tolyqtaı jobanyń ıdeıa avtory, júrgizýshisi – Láılá Sultanqyzy qurǵan «Mariyam» qaıyrymdylyq qory qarjylandyrady.
Eger Siz nemese jaqynyńyz balaly bolýdy armandap júrse http://www.mariyamfund.kz/ saıtyna kirip, ótinim qaldyryńyz. Bir januıanyń baqytynyń eselenýine atsalysam deseńiz, qaıyrymdylyq jasaı alasyz.
