Abaıdyń 175 jyldyq mereıtoıy elordada bastalady
«Aldymyzda kele jatqan 2020 jyl elimiz úshin erekshe rýhanı oqıǵalar kezeńine aınalǵaly otyr. Halqymyzdyń uly oıshyly, aqyn Abaı Qunanbaıulynyń 175 jyldyǵy men dala danyshpany, adamzattyń ekinshi ustazy Ál-Farabıdiń 1150 jyldyq mereıtoılaryn joǵary deńgeıde atap ótý bizdiń eldigimizdi, egemendigimizdi, eńseli memlekettigimizdi aıshyqtaıtyn bolady. Ulylarymyzdy ulyqtap, danalarymyzdy tórge ozdyrý – halqymyzdyń mereıin ústem etetin ıgilikti dást úr. Biz osy uly tulǵalar arqyly qazaq dalasynda ejelden órkenıettiń, bilim men ǵylymnyń, ádebıettiń órken jaıǵanyn búkil álemge jan-jaqty pash etetin bolamyz. Sondyqtan bul mereıtoılar bárimiz úshin árıne úlken syn, tarıhı jaýapkershilik», - dedi Memlekettik hatshy Abaıdyń 175 jyldyq mereıtoıyn daıyndaý jáne ótkizý jónindegi memlekettik komıssııa otyrysynda.
Osy oraıda, ol mereıtoılardy daıyndaý jáne ótkizý jónindegi eki komıssııanyń jumysy mazmundyq jaǵynan sáıkes kelgendikten jáne ýaqytty tıimdi paıdalaný maqsatynda birge ótkizilip otyrǵandyǵyn eskertti.
«Memleket basshysynyń tapsyrmasyna sáıkes, biz búgingi bas qosýymyzda 2020 jyly osy eki mereıtoıdy ótkizýdiń jalpy respýblıkalyq josparlaryn bekitiýimiz kerek. Josparlardyń jobasy jergilikti jáne ortalyq atqarýshy organdarynda, Úkimette jáne Prezıdent Ákimshiliginde aldyn ala talqylandy», -dedi ol.
Otyrystyń birinshi bóliginde Abaıdyń 175 jyldyq mereıtoıyn ótkizý jáne daıyndaý máseleleri talqylandy.
«Hakim Abaıdy ulyqtaýǵa baǵyttalǵan is-sharalardyń bastaýy aldaǵy jyldyń 8 qańtarynda Nur-Sultan qalasynda «Qazaqstan» ortalyq kontsert zalynda saltanatty sharamen ashý usynylyp otyr. Sondaı-aq, negizgi mereıtoılyq sharalar Uly Abaıdyń kindik qany tamǵan qasıetti Semeı óńirinde atalyp ótilmek. Osy jáne ózge de irgeli is-sharalar jalpy respýblıkalyq josparynyń jobasynda qarastyrylǵan», - dedi Qyrymbek Kósherbaev.
