Abaı shyǵarmalary alǵash ret japon tiline aýdaryldy

TOKIO. QazAqparat– Japonııada qazaq aqyny jáne aǵartýshysy Abaı Qunanbaıulynyń japon tiline aýdarylǵan alǵashqy shyǵarmalar jınaǵynyń tusaýkeseri ótti. Sharaǵa eldiń saıası, mádenı jáne qoǵamdyq toptarynyń, sondaı-aq dıplomatııalyq korpýstyń ókilderi qatysty, dep habarlaıdy QazAqparat tilshisi.

QR Syrtqy ister mınıstrliginen málim etkendeı, Japonııa Parlamentiniń joǵarǵy palatasynyń Spıkeri Akıko Santo is-sharanyń basty qonaǵy boldy. Onyń aıtýynsha, Abaıdyń fılosofııasy adamzattyń qazirgi kezeńdegi barlyq qıynshylyqtardy, sonyń ishinde koronavırýs pandemııasyn eńserý úshin qajetti danalyq pen batyldyqqa úıretedi.

Elshi Erlan Baýdarbek-Qojataev bıyl Abaıdyń 175 jyldyǵy aıasynda búkil álem boıynsha ótkizilip jatqan is-sharalar Qazaqstannyń mádenı dıplomatııasynyń damýyna erekshe úles qosyp jatqanyn aıtty.

Japonııa Mádenıet jónindegi agenttiginiń tóraǵasy Reheı Mııata óz sózinde Abaı óleńderiniń jáne «Maneshıý» japon óleńderiniń kóne jınaǵynyń jalpy mazmuny uqsas bolǵanyna tánti bolǵanyn atap ótip, eki el ejelden Jibek joly arqyly baılanysqanyn jetkizdi.

Kitaptyń túsaýkeserin Kún shyǵys elinde zamanaýı japon poezııasynyń «qozǵaýshy kúshi» dep atalyp júrgen ataqty aqyn jáne synshy Kıvao Nomýra jasady.

Kórermender ánshi Rankanyń Abaıdyń «Kózimniń qarasy» ánin japon tilinde oryndaýyn ystyq yqylaspen qarsy aldy.

Jalpy alǵanda, Abaıdyń mereıtoıy aıasynda Tokıodaǵy Qazaqstan Elshiligi bıyl birqatar is-shara uıymdastyrdy.

Atap aıtqanda, Abaı shyǵarmalaryn mánerlep oqý estafetasyna Japonııa Parlamentiniń depýtaty jáne Qazaqstanmen Parlamenttik dostyq lıgasynyń tóraǵasy Takeo Kavamýra qatysyp, QR Parlamentiniń senatory Muhtar Qul-Muhammedtiń chellendjine jaýap retinde japon tilinde «Qara sózden» úzindi oqydy.

Sonymen qatar, «Abai World Challenge» halyqaralyq vıdeomarafonynda Japonııa aqyndar qaýymdastyǵynyń prezıdenti ıAmada Takaakı Abaıdyń kóktemge arnalǵan óleńderiniń japonsha aýdarmasyn usyndy. Tokıo ortalyq kitaphanasynda Abaı Qunanbaıulynyń 175 jyldyǵyna arnalǵan kitap jáne ıllıýstratsııalar kórmesi ótti.

Kitap shyǵarý jobasyn QR Mádenıet jáne sport mınıstrliginiń tapsyrysy boıynsha Qazaqstannyń Japonııadaǵy Elshiliginiń qoldaýymen «Ulttyq aýdarma bıýrosy» qoǵamdyq qory júzege asyrdy.

Mátinderdiń ádebı aýdarmasyn Tokıo shet tilder ýnıversıtetiniń professory Hırokı Sakaı, qazaq ádebıetin zertteýshi Mıkııa Nıshımýra, japon-qazaq sózdiginiń aýdarmashysy jáne qurastyrýshysy Shıgenobý Masýdjıma oryndady.

Abaı Qunanbaıulynyń japon tilindegi kitaby atalmysh eldiń kitaphanalary men oqý oryndaryna taratylady.