Abaı oblysynda ormanda adasqan sileýsin adamdardan pana tapty

ASTANA. KAZINFORM — Abaı oblysynyń Besqaraǵaı aýdanyna qarasty Jylandy aýylynda turǵyndar kishkentaı sileýsinniń bóltirigin baıqap qalǵan, dep habarlaıdy Kazinform agenttiginiń tilshisi.

Janýar jalǵyz júrgen, sondyqtan adamdar kómektespese, qystan aman shyǵýy qıyn bolar edi. Aýyl turǵyndary men «Semeı ormany» rezervatynyń Jańasemeı fılıalynyń ınspektorlary sileýsindi abaılap ustap, ony jaraqattan qorǵaǵan. Boljam boıynsha, ol anasynan adasyp qalǵan nemese ormanda joǵalyp ketken.

— Memlekettik ınspektorlar sileýsinniń bóltirigin Semeı qalasyndaǵy Bıologııalyq ortalyqqa jetkizý týraly sheshim qabyldady. Qazir ol jerde mamandar kútip-baǵyp otyr. Ortalyqta janýarǵa qajetti kómek kórsetilip, veterınarlar tekserýden ótkizdi jáne ony mekeme balansyna tirkedi, — dep habarlady «Semeı ormany» memlekettik orman tabıǵı rezervaty.

Qazirgi tańda kishkentaı sileýsinniń jaǵdaıy jaqsy, ol jańa ortasyna úırenip keledi. Mamandar mundaı jaǵdaılardyń óte sırek kezdesetinin aıtady.

Ekologtar eger jabaıy janýar eldi meken mańynan baıqalsa, ony ózdiginen ustaýǵa tyryspaı, bul týraly tabıǵat qorǵaý qyzmetiniń mamandaryna habarlaý qajet ekenin eskertedi.

Budan buryn Aqmola oblysynda kishkentaı sileýsin úılerdiń aýlasyna kirip ketkenin jazǵanbyz.