Abaı oblysynda et kombınaty salynady
SEMEI. KAZINFORM – Abaı oblysynda 2026 jylǵa deıin et kombınaty salynbaq.
Abaı oblystyq Aýyl sharýashylyǵy basqarmasynyń málimetine súıensek, óńir halqyn qajetti azyq-túlikpen qamtamasyz etý maqsatynda agroónerkásiptik keshenniń barlyq salasyn damytý, qaıta óńdeý kólemin ulǵaıtý sharalary júrgizilýde.
«Búginde oblystyń aýyl sharýashylyǵy taýaryn óndirýshileri 11,3 myń tonna sıyr jáne 6 myń tonna qus eti, 16 mln dana jumyrtqa, 27,9 myń tonna un, 3 myń tonna nan jáne 922 tonna makaron ónimderin óndirdi. Óńir boıynsha shujyq ónimderin shyǵaratyn 3 tseh jumys isteıdi. Onyń ishinde Borodýlıha aýdanynyń «E.Zaıtenov» (jylyna 375 tonna ónim) jáne Semeı qalasynyń «Qalıqanuly» sharýa qojalyqtary (jylyna 100 tonna ónim) óz sharýashylyqtarynan shıkizat óndiredi. «Araı-EAST FOOD» JShS (jylyna 3650 tonna ónim) shıkizatty Mońǵolııadan satyp alady», - delingen aqparatta.
2024-2026 jyldary oblysta et kombınattaryn salý jobalary bastalady. Máselen, Semeı qalasynyń aýmaǵynda jyldyq qýaty 12 600 tonna bolatyn «Eýrazııa Agro Semeı» JShS et kombınatyn salý josparlanyp otyr. Jobaǵa sáıkes qurylys jumystary 2026 jyly aıaqtalyp, paıdalanýǵa beriledi.
Budan bólek, 2024 jyly qýattylyǵy jylyna 600 tonna daıyn ónim shyǵaratyn «Yqylas Invest» JShS et konservi zaýyty ashylmaq.
