Abaı oblysynda alaıaqtar jańa ádiske kóshti

SEMEI. KAZINFORM — Abaı oblysynda alaıaqtar halyqqa tabysy joǵary jumys usyný arqyly aldaýǵa kóshti.

Bul týraly oblystyq Polıtsııa departamentiniń baspasóz qyzmeti habarlap otyr. 

— Internet-alaıaqtar tanymal platformalarda jáne áleýmettik jelilerde júktemesi az, biraq tabysy joǵary jumysqa ornalasý týraly habarlandyrýlar jarııalaıdy. Qyzyqqan adam jaýap bergennen keıin, olarǵa jalǵan saıttarǵa siltemeler, jeke derekterdi jınaýǵa arnalǵan saýalnamalar jiberiledi. Zııandy baǵdarlamany «jumys isteýge arnalǵan mobıldi qosymsha» degen jeleýmen ornatýdy usynady. Bul alaıaqtarǵa telefondaǵy banktik derekterdi, messendjerlerdi basqarýǵa múmkindik beredi, — delingen aqparatta.

Sondyqtan polıtseıler halyqqa qylmyskerlerdiń qurbany bolmas úshin birqatar keńes usyndy. 

— Qujattardy jibermes nemese qosymshalardy júktemes buryn jumys berýshiniń zańdylyǵyn jáne saıttyń mekenjaıyn tekserińiz. Qosymshalardy tek Google Play, App Store resmı dúkenderinen ornatyńyz. Resmı shart jasasqanǵa deıin jeke basty kýálandyratyn qujattardyń kóshirmeleri men derekterin jáne bank kartalaryn usynbańyz. Kez kelgen kúmán týyndaǵan kezde dereý polıtsııaǵa habarlasyńyz, — delingen habarlamada.

Eske salsaq, osyǵan deıin BQO-da alaıaqtarǵa senip qalǵan kásipker 22 mln teńgesinen aıyrylǵany habarlanǵan.