Abaı oblysy Jarma aýdanynda 9 úıge sý kirdi

SEMEI. KAZINFORM – Abaı oblysy Jarma aýdanynda 12 aýla qyzyl sý astynda qalyp, 9 úıge sý kirdi.

Oblystyq Tótenshe jaǵdaılar departamenti baspasóz qyzmetiniń málimetine súıensek, erigen qar sýy Úshbıik aýylyna qaraı aqqan. Sonyń saldarynan eki shetki kóshe túgeldeı sý astynda qaldy.

«Barlyǵy 12 aýlany qyzyl sý basty. Onyń ishinde 9 úıge sý kirdi. Osy úılerdiń ishindegi 4-inde adam turmaǵan», - delingen aqparatta.

Sý basqan úılerdiń turǵyndary óz betterimen evakýatsııalandy. Qazir olar týystarynyń úılerine ornalasqan.

«Jergilikti atqarýshy organdardan 15 adam jáne 5 tehnıka erigen sýdy burý boıynsha ınjenerlik jumystar júrgizýde. Sý deńgeıi 40 sm-ge tómendep, 4 úıden sý shyǵaryldy. Osy baǵyttaǵy jumystar jalǵasyp jatyr», - dep habarlady Abaı oblysy ákimdiginen.