55 qazaqstandyq Amerıkadan elge oraldy

NUR-SULTAN. QazAqparat - Koronavırýs pandemııasy aıasynda AQSh-taǵy qazirgi jaǵdaıǵa baılanysty búgin Vashıngtondaǵy Qazaqstan Elshiliginiń jáne Nıý-Iork pen San-Frantsıskodaǵy Qazaqstan Bas konsýldyqtarynyń kómegimen AQSh aýmaǵyndaǵy 55 otandasymyz elge qaıtaryldy, dep habarlaıdy QazAqparat Syrtqy ister mınıstrligine silteme jasap.

Birqatar halyqaralyq áýe reısteriniń bolmaýyna jáne sheteldikter úshin tranzıttik aımaqtardyń jabylýyna baılanysty bizdiń kóptegen azamattarymyz Qazaqstanǵa ushyp shyǵý múmkindiginen aıyryldy.

«Osy jaǵdaıdy nazarǵa ala otyryp, Qazaqstannyń AQSh pen Reseıdegi elshilikteri birlesip, otandastarymyzdy Nıý-Iorkten Máskeý arqyly tranzıtpen ushyrdy» dep málim etti Syrtqy ister mınıstrliginen.

Eske sala keteıik, buǵan deıin Qazaqstannyń 33 azamaty Saýd Arbaııasynan aman-esen elge oralǵan bolatyn.