5 óńir bólingen nysanaly transfertterdi ıgere almaǵan

ASTANA. QazAqparat – 5 óńir bólingen nysanaly transfertterdi ıgere almady. Bul týraly Premer-Mınıstrdiń orynbasary – Qarjy mınıstri Erulan Jamaýbaev búgin Úkimet otyrysynda aıtty, dep habarlaıdy QazAqparat tilshisi.

«Jergilikti bıýdjetterdiń kiristeri 118 paıyzǵa atqaryldy jáne 3,5 trln teńgeni qurady. Jospar 542 mlrd teńgege, onyń ishinde salyqtar boıynsha 497 mlrd teńgege asyra oryndaldy. Kirister boıynsha josparlar barlyq óńirlerde asyra oryndaldy», - dedi Erulan Jamaýaev.

Vedomstvo basshysynyń dereginshe, jergilikti bıýdjetterdiń shyǵystary 6,7 trln teńgeni qurady. Atqarylmaǵany - 83 mlrd teńge.

«Bıyl óńirlerge 2 trln teńgege jýyq nysanaly transfertter kózdelgen. Olarǵa 1 tamyzǵa 891 mlrd teńge bólingen. Onyń 97,4 paıyzy ıgerilgen. Igerilmegeni – 23 mlrd teńge. Eń kóp ıgerilmeý Astana qalasy, Atyraý, Jetisý, Qaraǵandy jáne Almaty oblystarynda qalyptasty», - dedi mınıstr.