Úkimet quny $1,5 mlrd qundy qaǵazdy halyqaralyq kapıtal naryǵyna shyǵardy
ASTANA. KAZINFORM – Qazaqstan Respýblıkasynyń Qarjy mınıstrligi aınalym merzimi 5 jyl bolatyn 1,5 mlrd dollar kólemindegi egemendi eýrooblıgatsııalardy halyqaralyq kapıtal naryǵyna sátti shyǵardy.
Vedomstvo málimetinshe, jahandyq ınvestorlardyń tarapynan buǵan joǵary qyzyǵýshylyq baıqalyp, túpkilikti kiris deńgeıi 4,412% kóleminde jáne AQSh qazynashylyq oblıgatsııalaryna spred 85 bazıstik tarmaq mólsherinde boldy — Qazaqstannyń eýrooblıgatsııalar naryǵyna qatysqan kezeńindegi eń tómengi kórsetkish.
Ótinimder kitaby 4,4 mlrd dollardan asyp, bul suranystyń usynystan edáýir artýyn qamtamasyz etý men mámileniń baǵa ólshemsharttaryn ońtaılandyrýǵa múmkindik berdi.
Baǵaly qaǵazdardyń shyǵarylymyna Eýropa men AQSh-tyń kóptegen aýqymdy ınstıtýtsıonaldy ınvestory qatysyp, sondaı-aq buǵan deıin Qazaqstannyń egemendi boryshyn ornalastyrylýǵa qatyspaǵan jańa qatysýshylardy qosa alǵanda, Azııa men Taıaý Shyǵystan kelgen ınvestorlardyń rekordtyq kórsetkishi tirkeldi.
Salystyrmaly túrde belgilengen kiris mólsheri ınvestıtsııalyq reıtıngi bar elder shyǵarǵan 5 jyldyq egemendi eýrooblıgatsııalardyń ishindegi eń tómengisi bolyp sanalady jáne 2025 jyly Shyǵys Eýropa, Afrıka jáne Taıaý Shyǵys aımaǵyndaǵy elder arasynda eń tómen bolyp, tek Kýveıtten (reıtıngi A+) ǵana qalys qaldy.
Buǵan qosa aıqyndalǵan tabys mólsheri Polsha, Qatar jáne Saýd Arabııasy sııaqty egemendi reıtıngi joǵary elderdiń uqsas shyǵarylymdarynyń tabys deńgeıinen tómen boldy. Bul jahandyq ınvestıtsııalyq qaýymdastyqtyń joǵary senimin kórsetip otyr.
Investorlardyń senimin nyǵaıtýǵa áser etken eleýli faktorlar – birizdi iske asyrylyp jatqan fıskaldy jáne salyq reformalary, sondaı-aq Memleket basshysynyń bastamasy boıynsha júrgizilip jatqan aýqymdy saıası ózgerister.
Bul sharalar Qazaqstannyń ınvestıtsııalyq klımatyna halyqaralyq arenada oń áserin tıgizdi.
Eýrooblıgatsııalar London qor bırjasynda, «Astana» halyqaralyq qarjy ortalyǵynyń bırjasynda jáne Qazaqstan qor bırjasynda lıstıngiden ótedi.