38 myńnan astam tirkelmegen SIM-karta tárkilendi
ASTANA. KAZINFORM – SIM-BOX paıdalanǵan alaıaqtyq áreketiń joly kesildi. Bul týraly Ulttyq ulan baspasóz qyzmeti habarlady.
Jyl basynan beri Ulttyq ulannyń «Búrkit» arnaıy jasaǵy ІІM-niń kıberqylmysqa qarsy bólimsheleri jáne «Qazahtelekom» AQ-men birlesip, 57 SIM-BOX qurylǵysyn zańsyz paıdalanýdyń jolyn kesti. Arnaıy operatsııa barysynda túrli uıaly baılanys operatorlaryna tıesili 38 myńnan astam tirkelmegen SIM-karta tárkilendi.
Tek naýryz aıynyń alǵashqy onkúndiginde «Búrkit» arnaıy jasaǵy men polıtsııa qyzmetkerleri osyndaı 4 faktini anyqtady.
— Astanada avtokóliginde el aýmaǵynda alaıaqtyq qońyraýlar shalýǵa arnalǵan SIM-BOX qurylǵysyn tasymaldaǵan shetel azamaty ustaldy. Tintý barysynda odan 128 uıashyǵy bar eki SIM-BOX, 19 qazaqstandyq operatordyń SIM-kartasy jáne kompıýterlik tehnıka tárkilendi. Odan bólek mobıldi baılanysqa zańsyz aralasý faktisi boıynsha elordalyq eki turǵyn ustaldy. Olardan eki SIM-BOX jáne kompıýterlik tehnıka tabyldy. Sol kúni Shymkent qalasynyń turǵyny da SIM-BOX qurylǵylaryn zańsyz saqtaǵany jáne paıdalanǵany úshin ustaldy, — delingen habarlamada.
Tergeý barysynda kúdiktilerdiń krıptovalıýta arqyly apta saıyn shamamen 1 myń AQSh dollary kóleminde zańsyz paıda taýyp otyrǵany anyqtaldy. Barlyq ustalǵandar qamaýǵa alyndy, tergeý jalǵasyp jatyr.
Aıta ketelik pavlodarlyqtan 400-den astam ártúrli mobıldi operatorlardyń SIM-kartasy tabylǵan edi.