3 dropper sottaldy

ASTANA. KAZINFORM –  Úsh tulǵanyń árqaısysy 2 jylǵa bas bostandyǵynan aıyrý jazasyna sottaldy. Bul týraly Astana qalasynyń prokýratýrasynyń baspasóz qyzmeti habarlady. 

Telegram messendjeri arqyly tergeý barysynda anyqtalmaǵan tulǵamen úsh dropper qylmystyq sóz baılasyp, qart adamdarǵa telefon soǵyp, jaqyn týystarynyń jol erejesin buzǵanyn, sonyń saldarynan kómekke muqtaj adamdar zardap shekkenin habarlaǵan.

— Kýratordyń nusqaýymen «jol-kólik oqıǵasynan zardap shekkenderge» materıaldyq kómek retinde aldanǵan tulǵalardan 14 mln teńgeden astam aqsha alyp, ony qylmysty uıymdastyrýshynyń esep aıyrysý shotyna aýdaryp, olardyń áreketteri úshin alynǵan somanyń bir bóligin ózine qaldyrǵan úsh kináli tulǵa anyqtaldy.

Olardyń ekeýi shet memlekettiń azamaty bola tura, jábirlenýshilerdiń aqshasyn jymqyryp, elden shyqpaq bolǵan. Alaıda, olar reısti kútip turǵan kezde Almaty qalasynyń halyqaralyq áýejaıynda ustaldy, — delingen habarlamada.

Memlekettik aıyptaýshy sotqa bultartpas aıǵaqtardy usyna otyryp, kinálilerdiń alaıaqtyqqa, ıaǵnı asa iri mólsherde aldaý jolymen bótenniń múlkin urlaýǵa, aldyn ala sóz baılasý arqyly adamdar tobynda birneshe ret qaıtalaý nıetin dáleldedi.

Keltirilgen materıaldyq shyǵyn tolyǵymen óteldi.

Úsh tulǵanyń árqaısysy 2 jylǵa bas bostandyǵynan aıyrý jazasyna sottaldy.

— Qala prokýratýrasy alaıaqtyq jasaǵany úshin múlki tárkilenip, 10 jylǵa deıin bas bostandyǵynan aıyrý jazasy túrinde qylmystyq jaýapkershilik kózdelgenine nazar aýdarady, — delingen habarlamada. 

Aıta ketelik ІІM azamattardy dropperlerdiń qatysýymen jasalatyn esirtki qylmystary týraly eskertti.