28 shilde. Jylnama
Kazinform oqyrman nazaryna 28 shildege arnalǵan ataýly kúnder men este qalar oqıǵalar kúntizbesin usynady.
Dúnıejúzilik gepatıtke qarsy kúres kúni
2008 jyly Halyqaralyq gepatıtpen kúres alıansynyń bastamasymen engizildi. 2011 jyly Dúnıejúzilik densaýlyq saqtaý uıymy bul datany óziniń kúntizbesine engizdi, osylaısha Dúnıejúzilik gepatıtke qarsy kúni resmı mártebe alyp, jyl saıyn 28 shildede atap ótiletin boldy.
ESTE QALAR OQIǴALAR
1969 jyly Jambyl oblysynda Jańatas qalasynyń irgetasy qalandy. Jańatas - Jambyl oblysy Sarysý aýdanynyń ortalyǵy. Qala tarıhy fosforıt óndirisiniń jandanýymen tikeleı baılanysty.
1992 jyly Brıýsselde Qazaqstan Respýblıkasy men Eýropalyq Komıssııa arasynda dıplomatııalyq qarym-qatynas ornatý týraly nota almasý rásimi ótti.
1995 jyly Qazaqstan Respýblıkasynyń Prezıdenti 1995 jyldyń 30 tamyzynda respýblıkalyq referendým ótkizý týraly qaýly shyǵardy. Keıinnen osy referendým boıynsha Qazaqstan Respýblıkasynyń jańa Konstıtýtsııasynyń jobasy qabyldandy.
2003 jyly QR Ulttyq banki nomınaly 10 000 teńgelik banknotty aınalymǵa engizdi.
2007 jyly QR Prezıdenti bilim salasynda qoǵamdyq qatynastardy retteýge, osy saladaǵy memlekettik saıasattyń qaǵıdattaryn anyqtaýǵa jáne Qazaqstan Respýblıkasy azamattary, sondaı-aq elimizde turǵylyqty turatyn shetel azamattary jáne azamattyǵy joq adamdardyń bilim alýǵa konstıtýtsııalyq quqyǵyn qamtamasyz etýge baǵyttalǵan «Bilim týraly» Zańǵa qol qoıdy.
2012 jyly Qazaqstannnyń veloshabandozy Aleksandr Vınokýrov HHH jazǵy Olımpıada oıyndarynyń alǵashqy jarys kúninde tas jolda toptyq jarysta máre syzyǵyn birinshi bolyp kesip ótip, Qazaqstan qorjynyna alǵashqy altyn medal saldy.
2012 jyly Ońtústik Koreıa Esý qalasynda EXPO-2012 halyqaralyq mamandandyrylǵan kórmede Qazaqstannyń Ulttyq kúniniń saltanatty ashylý rásimi ótti.
2012 jyly Aqmola oblysynyń Sandyqtaý aýdanyndaǵy arheologııalyq jumystar kezinde qola, erte temir jáne Orta ǵasyr dáýiri kezeńderiniń buǵan deıin belgisiz bolǵan 80 eskertkishi tabyldy.
2016 jyly Ystanbulda QR Investıtsııa jáne damý mınıstrliginiń «Kaznex Invest» eksport jáne ınvestıtsııa jónindegi ulttyq agenttik» AQ-nyń ókildigi ashyldy. Atalmysh qurylymnyń Túrkııa memleketindegi arnaıy ókili retinde Nurıddın Amanqul taǵaıyndaldy.
2016 jyly Óskemende avtozaýyt alańynda alǵashqy KIA Soul EV elektromobılin qurastyrdy. Onyń maksımaldy jyldamdyǵy saǵatyna 145 shaqyrym Tolyq zarıadtalǵan kólik batareıasy 14-ten 18 saǵatqa deıin jetedi. 100 shaqyrymǵa elektromobıldi qýattaý quny 170 teńgeni quraıdy.
2017 jyly Ońtústik Qazaqstan oblysy Sozaq aýdanynda XII ǵasyrǵa tıesili eki músin tabyldy. Aýdan turǵyndary ejelgi eskertkishterdi Qarataý jotasynda Arpa ózeniniń jaǵalaýynan tapqan. Músinde er adam men áıel beınelengen.
2017 jyly Almatyda 1964 jyldan 1975 jylǵa deıin Saýd Arabııasynda bılik etken Feısal patshanyń altyn qarýy qoıylǵan kórme ashyldy. Kórmede erekshe, sırek, tarıhı muraǵattyq qujattar, Quran, jeke zattary, Ál-Feısalǵa ártúrli memleketterdiń basshylary syıǵa tartqan medalder, ordender men tósbelgiler, sýretteri jáne t.b. qoıyldy. Ásirese altynmen jáne kúmispen qaqtalǵan saltanatty qarý túrleri kózdiń jaýyn alady.
2018 jyly Astanada alǵash ret grepplıngten Álem kýbogi ótti. Qazaqstan Respýblıkasy – dál osyndaı formatta jarys ótkizgen álemdegi birinshi memleket. Grepplıng – dzıýdo, sambo, djıý-djıtsý, erkin kúres, grek-rım jáne t.b. syndy kúres túrlerin biriktiretin sporttyq jekpe-jektiń túri.
2021 jyly bal jáne ara ónimderin óndiretin on qazaqstandyq kompanııa Saýd Arabııasyndaǵy senimdi eksporttaýshylar tizilimine endi.
2022 jyly Denıs Tenniń «Soqyr mahabbat» («Slepaıa lıýbov») stsenarııi boıynsha túsirilgen fılmniń kórsetilimi ótti. Mánerlep syrǵanaýshy bul stsenarııdi 2018 jyly jazǵan, tórt jyldan keıin fılm prokatqa shyqty.
Fılm eki erekshe adam - Saýl esimdi jigit pen Lýna esimdi qyzdyń qarym-qatynasy men bir-birine súıispenshiligin týraly baıandaıdy. Qyz sańyraý, al jigit - soqyr. Alaıda, shekteýli múmkindikterge qaramastan, olardyń sezimderiniń shegi joq. Fılm boıynda Denıs Tenniń rýhy men qatysýy seziledi. Leıtmotıv jáne saýndtrek retinde konkı tebýshi jazyp, oryndaǵan án tańdaldy.
2023 jyly Almaty mektepteriniń birinshi synyptaryna qabyldaý bastalǵannan beri tórt aıdyń ishinde 25 myńnan astam ótinish túsken. Almaty ákimdiginiń baspasóz qyzmeti habarlaǵandaı, qala turǵyndary balalardy birinshi synypqa qabyldaýǵa 25 009 ótinish bergen.
2023 jyly QR TJM "Qazaqstan Respýblıkasynyń seısmologııalyq salasyn damytýdyń 2024-2028 jyldarǵa arnalǵan Keshendi josparyn bekitý týraly" Úkimettiń qaýlysyn daıyndady. Seısmıkalyq qaýipti aımaqtarda-eldiń shyǵysy, ońtústik – shyǵysy, ońtústiginde-7 mıllıonnan astam adam turady, ónerkásiptik áleýettiń 50% - dan astamy shoǵyrlanǵan, 400-den astam qalalar men eldi mekender ornalasqan.
