Bas prokýratýra Google derekteriniń tarap ketýine baılanysty qazaqstandyqtarǵa eskertý jasady
ASTANA. KAZINFORM – Shabýyl áleýmettik ınjenerııa arqyly júzege asqan: alaıaqtar Google qyzmetkerin aldap, IT-jabdyqqa qol jetkizýge májbúrlegen jáne Salesforce Data Loader qosymshasyn zańsyz paıdalanǵan. Bul týraly Bas Prokýratýranyń baspasóz qyzmeti habarlady.
Qoǵamdyq qaýipsizdik pen qylmystyq qaterlerdi boljaý ortalyǵy men Bas prokýratýranyń Quqyqtyq statıstıka jáne arnaıy esep komıteti álemdik ınternet keńistigin baqylaý barysynda Google derekter bazasyn buzý faktisinińanyqtalǵanyn jáne bul jaǵdaı Gmail qoldanýshylarynyń derekteriniń taraýymen baılanysty ekenin habarlady.
— Uıymdastyrýshy ShinyHunters hakerlik toby 2,5 mıllıardqa deıingi akaýntqa qatysty baılanys derek kózderine qol jetkizgen, biraq paroldardyń ózderi tikeleı urlanbaǵan.
Shabýyl áleýmettik ınjenerııa arqyly júzege asqan: alaıaqtar Google qyzmetkerin aldap, IT-jabdyqqa qol jetkizýge májbúrlegen jáne Salesforce Data Loader qosymshasyn zańsyz paıdalanǵan.
Bul derekterdi qoldana otyryp, qylmyskerler Google atynan qońyraý shalyp, jalǵan habarlamalar taratyp, qoldanýshylardan Gmail parolin qalpyna keltirýdi talap etken. Osylaısha olar kodtar men qupııasózderdi nemese akkaýnttarǵa qoljetimdilikti ıemdengen, — delingen habarlamada.
Qaýipsizdik úshin usynylatyn sharalar:
1. Qupııasózdi birden aýystyrý, ásirese qarapaıym nemese qaıtalanatyndaryn.
2. Eki faktorly aýtentıfıkatsııany qosý nemese zamanaýı qorǵaý tásilderin (bıometrııa, PIN) paıdalaný.
3. Google atynan dep keletin qońyraýlar men hattarǵa senbeý — on shaqty jaǵdaıdyń toǵyzynda bul alaıaqtyq bolyp shyǵady.
4. Qoldanbalar men qosylymdardy baqylap, artyq ruqsattardy shekteý.
— Bul oqıǵa tipti jartylaı jarııalanǵan derekterdiń ózi keń aýqymdy alaıaqtyq syzbalardyń negizine aınala alatynyn kórsetedi. Sondyqtan qoldanýshylar men uıymdar qaýipsizdik sharalaryn der kezinde qabyldap, akkaýnttaryn únemi tekserip turýy qajet, bul derekterdiń urlanýyn nemese qaskúnemderdiń qolyna túsýin boldyrmaýǵa múmkindik beredi, — delingen prokýratýra habarlamasynda.
Aıta ketelik Qazaqstanda jeke derekterge qol jetkizý erejeleri ózgertildi.