21 qańtar — ınjenerlik áskerlerdiń kúni
ASTANA. KAZINFORM — 21 qańtarda Qazaqstanda eń jaýapty ári qaýipti áskerı mamandyqtardyń biriniń kásibı merekesi — Injenerlik áskerlerdiń kúni atalyp ótiledi, dep habarlaıdy Qorǵanys mınıstrliginiń baspasóz qyzmeti.
Olardyń qatarynda saperlar, ınjener-barlaýshylar, mehanık-júrgizýshiler, pontonshylar, kınologtar jáne basqa da mamandar bar. Áskerı ınjenerler baǵdarlardy daıyndaý men qamtamasyz etýge, fortıfıkatsııalyq qurylystar salýǵa, mınalyq-jarylǵysh bógetterdi ornatý jáne zalalsyzdandyrýǵa, ótkelder uıymdastyrýǵa, sondaı-aq áskerlerdi sýmen qamtamasyz etýge jaýapty.
Sonymen qatar olardyń mindetine áskerı nysandardy búrkemeleý nemese ımıtatsııalaý kiredi. Qaýipsizdikti qamtamasyz etýde ınjenerlik-saperlik bólimsheler erekshe ról atqarady. Olar aýmaqty mınalardan tazalaý jumystaryn júrgizedi. Bul qyzmet joǵary kásibı daıyndyqty, qatań tártipti jáne kúızeliske tózimdilikti talap etedi. Injenerlik áskerler zamanaýı barlaý quraldarymen, robototehnıkamen, jer qazý jáne pontondyq tehnıkamen jabdyqtalǵan.
Áskerı ınjenerler tótenshe jaǵdaılardyń saldaryn joıýǵa da tartylady. 2024 jylǵy kóktemgi sý tasqyny kezinde Oıyl jáne Esil ózenderi arqyly parom ótkelderi uıymdastyrylyp, 3 myńnan astam adam evakýatsııalandy, shamamen 1,5 myń tehnıka ótkizildi jáne 400 tonnadan astam gýmanıtarlyq kómek jetkizildi.
Qazaqstandyq ınjenerler halyqaralyq mıssııalarǵa da eleýli úles qosty. Iraktaǵy operatsııa barysynda olar 4 mıllıonnan astam jarylǵysh zatty zalalsyzdandyryp, 6,7 myń tekshe metrden astam sýdy tazartty. Qazirgi zamanǵy tehnıkamen jabdyqtalǵan jáne bilikti mamandarmen tolyqtyrylǵan ınjenerlik áskerler ulttyq qaýipsizdik júıesiniń mańyzdy quramdas bóligi bolyp qala beredi.
Buǵan deıin 19 qańtar — Tárbıe qurylymdary ofıtserleriniń kúni týraly jazǵanbyz.