2027 jyly Qazaqstanda bokstan álem chempıonaty ótedi
ASTANA. KAZINFORM - World Boxing halyqaralyq federatsııasy 2027 jyly Astanada bokstan álem chempıonatyn ótkizý týraly resmı túrde jarııalady. Bul týraly QR Ulttyq olımpıadalyq komıteti málim etti.
Bul álemdik birinshilik halyqaralyq jarys kúntizbesindegi mańyzdy oqıǵa bolmaq. Sebebi týrnır 2028 jyly AQSh-tyń Los-Andjeles qalasynda ótetin jazǵy Olımpıada oıyndary qarsańynda uıymdastyrylady. Chempıonattyń ótkizilý merzimi men uıymdastyrý jumystary týraly qosymsha aqparat keıinirek habarlanatyn bolady.
– 2027 jyly Olımpıada aldynda ótetin bokstan álem chempıonatyn ótkizý – Qazaqstan úshin úlken mártebe, ári jaýapkershilik. Bizdiń el iri halyqaralyq sporttyq jarystardy joǵary deńgeıde ótkizýde mol tájirıbege ıe jáne bul týrnır de sol dástúrden tys qalmaıtynyna senimdimin. Olımpıada aldyndaǵy bul chempıonattyń mańyzdylyǵyn túsine otyryp, World Boxing uıymyna bildirgen senimi úshin alǵysymdy aıtamyn, – dedi Qazaqstan Ulttyq Olımpıadalyq komıtetiniń prezıdenti, World Boxing Olımpıadalyq komıssııasynyń tóraǵasy Gennadıı Golovkın.
Aıta keteıik, Qazaqstan tarıhta ekinshi ret bokstan álem chempıonatyn qabyldaıdy. Buǵan deıin 2013 jyly Almatyda erler arasynda álem chempıonaty ótken edi.
Bokstan Azııa chempıonatynyń júldegerlerin jankúıerler áýejaıdan qarsy alǵanyn jazǵan bolatynbyz.