2026 jyly Astanada taǵy 12 mektep salynady
ASTANA. KAZINFORM – Elordada shamadan tys toly mektepter máselesi kezeń-kezeńimen sheshilip keledi, bıyl 9 mektep paıdalanýǵa berildi. Bul týraly Astana ákimi Jeńis Qasymbek aıtyp berdi.
– Ótken oqý jylynda rekordtyq mólsherde mektep salyndy jáne paıdalanýǵa berildi. Bul – 66 myń oqýshy ornyna arnalǵan 24 bilim berý uıymy. Osy 24 mekteptiń 16-sy Memleket basshysynyń «Keleshek mektepteri» ulttyq jobasy aıasynda salyndy. Jańa oqý jylynyń basynan bastap taǵy 9 mektep esigin ashty, - dedi J. Qasymbek Ortalyq kommýnıkatsııalar qyzmetinde ótken brıfıngide.
Sonymen birge, 2026 jylǵa 16 myń oqýshy ornyna eseptelgen taǵy 12 mekteptiń qurylysy josparlanǵan.
Memlekettik-jekeshelik áriptestik tetigi arqyly jańa balabaqshalar ashylýda, onyń ishinde qarqyndy damyp kele jatqan aýdandar qamtylǵan.
– Memleket basshysynyń tapsyrmasy boıynsha, qosymsha bilim berý nysandary da salynyp jatyr. Mysaly, Q. Muhamedhanov kóshesinde ornalasqan, 750 orynǵa arnalǵan TANYM jańa oqýshylar saraıy ashylýǵa daıyn. Sondaı-aq kelesi jyly TANYM Art jáne TANYM Sport atty taǵy eki oqýshylar saraıy ashylady, - dedi Jeńis Qasymbek.
Aıta keteıik, qarasha aıynda elordadaǵy halyq sany 1,6 mıllıon adamnan asqan.
Buǵan deıin Jeńis Qasymbek elorda joldaryndaǵy keptelisti azaıtý úshin qandaı sharalar qabyldanyp jatqanyn aıtty.
