2020 jyly 3 mlrd kVt/saǵat «jasyl» energııa óndiriledi

NUR-SULTAN. QazAqparat - 2020 jyly Qazaqstanda jańartylatyn energııa kózderinen 3 mlrd kVt/saǵat elektr energııasy alynady. Bul týraly búgin Energetıka mınıstrliginiń alqa otyrysynda vedomstvo basshysy Nurlan Noǵaev málim etti, dep habarlaıdy QazAqparat tilshisi.

Mınıstrdiń aıtýynsha, elimizde jańartylatyn energetıka naryǵy jyl saıyn qarqyndy ósýde. Máselen, 2019 jyly 2018 jyldyń uqsas kezeńimen salystyrǵanda 77,8 paıyz ósimmen 2,4 mlrd kVt/saǵat «jasyl» energııa óndirildi. Elektr energııasyn óndirýdiń jalpy kólemindegi jańartylatyn energııa kózderiniń úlesi 2,3 paıyzǵa jetip otyr.

«2019 jyly jańartylatyn energııa kózderiniń 21 nysany paıdalanýǵa berildi. JEK jobalary boıynsha tartylǵan ınvestıtsııalardyń jalpy kólemi 613 mln AQSh dollaryn quraıdy. Jalpy qýaty 1050,1 MVt-ty quraıtyn jańartylatyn energııa kózderiniń 90 nysany iske qosyldy. 2020 jyly jalpy qýaty 605,5 MVt-ty quraıtyn 18 JEK nysanyn engizý josparlanýda. 2020 jyldyń qorytyndysy boıynsha JEK óndirý jospary shamamen 3 mlrd kVt-saǵatty quraıtyn bolady», - dedi ol.

Nurlan Noǵaevtyń dereginshe, 2019 jyly jıyntyq qýaty 255 MVt quraıtyn JEK jobalaryna arnalǵan halyqaralyq aýktsıondyq saýda-sattyqtar elektrondyq formatta ótkizildi. Saýda-sattyq nátıjesi boıynsha 12 kompanııa jıyntyq qýaty 202 MVt-qa JEK-ti qoldaý jónindegi qarjy-esep aıyrysý ortalyǵymen 15 jylǵa kelisimshart jasasty.

2020 jyly «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý jáne elektr energetıkasy máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyn qabyldaý kútilýde. Usynylǵan zań jobasynyń tujyrymdamalyq jańashyldyǵy – manevrlik qýattar qurylysyn yntalandyrý, JEK-ti qoldaýǵa baǵyttalǵan tolassyz tarıfti engizý, JEK-ti damytý úshin qolaıly jaǵdaı jasaý.