2019-2021 jyldary elde 148 599 neke buzylǵan

ASTANA. QazAqparat – 2019-2021 jyldary eldegi 148 599 neke buzylǵan. Ajyrasý faktileri ásirese 5-9 jyl aralyǵyndaǵy nekeler arasynda baıqalǵan.

Bul týraly Premer-Mınıstr Álıhan Smaıylov Májilis depýtattarynyń saýalyna joldaǵan jaýabynda aıtty, dep habarlaıdy QazAqparat tilshisi.

«Tolyq emes otbasylar» sanatyn «Baqytty otbasy» baǵdarlamasyna qaıtarý týraly aıtsaq, qazirgi tańda turǵyn úı alýǵa kezekte mynadaı sanattaǵy azamattar tur: kóp balaly otbasylar (103 myń azamat), 1 jáne 2 toptaǵy múgedektigi bar adamdar (54 myń azamat), múgedektigi bar balalary bar otbasylar (25 myń azamat), jetim balalar (63 myń azamat).

Sonymen qatar, «Baqytty otbasy» baǵdarlamasy iske qosylǵan sátten bastap «tolyq emes otbasylar» sanatyndaǵy kezek 75% ósken. (2019j. – 85,4 myń azamat kezekte bolsa, 2023j. - 150,2 myń bolǵan) jáne olardyń úlesi kezekte turǵandardyń jalpy sanynyń (641 myń adam) 24%-yna jetken. Bul óz kezeginde kezekte turǵandardyń jasandy ósýine ákeldi. Basqa sanattar arasynda áleýmettik narazylyq týdyrdy. Kóbinese baǵdarlamaǵa qatysý jáne osy sanat boıynsha turǵyn úıge muqtajdardy esepke alý úshin jalǵan neke qııý, mártebeni saqtaý nemese alý maqsatynda neke qııýdy ádeıi boldyrmaý belgilengendikten, osy sanat alynyp tastaldy», - dep túsindiredi Úkimet basshysy.

Álıhan Smaıylov keltirgen anyqtamaǵa súıensek, 2019-2021 jyldary eldegi ajyrasýlar sany 148 599-ǵa jetken. Ajyrasý fatkileri ásirese 5-9 jyl aralyǵyndaǵy nekeler arasynda baıqalǵan.

«Baspana kezeginde turǵandardyń, onyń ishinde tolyq emes otbasylardyń turǵyn úı máselelerin sheshý úshin birqatar túrli tetikter kózdelgen:

- respýblıkalyq jáne jergilikti bıýdjetter qarajaty esebinen satyp alý quqyǵynsyz jalǵa beriletin turǵyn úı salý nemese satyp alý;

- jeke turǵyn úı qorynda jaldaý aqysyn sýbsıdııalaý;

- kredıttik turǵyn úı salý jáne kiristerdiń bolýyna baılanysty «Otbasy banki» AQ-da (budan ári – Otbasy banki) jarna boıynsha 5% jeńildikpen kredıtteý», - dep jazylǵan jaýapta.