20 naýryzda astronomııalyq kóktem bastaldy
ASTANA. KAZINFORM – 20 naýryz kúni Soltústik jarty sharda astronomııalyq kóktem bastaldy. Bul kúni Kún dál shyǵystan shyǵyp, dál batysqa batady, dep habarlaıdy TASS Máskeý planetarııiniń baspasóz qyzmetine silteme jasap.
Astronomııalyq kóktem kún men tún teńelýi kezinde bastalady. Bul sátte Kún aspan ekvatoryn qıyp ótip, aspan sferasynyń ońtústik jarty sharynan soltústik jarty sharyna ótedi. 2026 jyly bul qubylys Máskeý ýaqytymen 17:46-da tirkeldi.
Mamandardyń aıtýynsha, kún men tún teńeletin kúni Kún dál shyǵystan shyǵyp, dál batysqa batady. Osy kúnnen keıin Kúnniń shyǵý núktesi birtindep soltústik-shyǵysqa, al batýy soltústik-batysqa qaraı yǵysady. Soltústik jarty sharda kún uzaryp, tún qysqara bastaıdy.
Sonymen qatar astronomdar 20 naýryzda kún men tún teń bolǵanymen, jaryq ýaqyt azdap uzaq bolatynyn túsindirdi. Buǵan atmosferadaǵy refraktsııa, ıaǵnı kún sáýlesiniń synýy sebep.
– Refraktsııa áserinen baqylaýshy Kúnniń shyǵýyn sál erterek kóredi, al batýyn keshirek baıqaıdy. Sondyqtan kún men tún teńelgen kúnniń ózinde jaryq ýaqyt shamamen 8-11 mınýtqa uzaq bolady, – dedi planetarıı mamandary.
Osy erekshelikke baılanysty kún men túnniń naqty uzaqtyǵy teń bolatyn ýaqyt kóktemgi teńelýden keıin 2-3 kún ótken soń ǵana baıqalady. Budan keıin Soltústik jarty sharda jaryq ýaqyt birtindep ulǵaıa beredi.
Astronomııalyq kóktem 21 maýsymǵa deıin jalǵasady. Bul kúni jazǵy kún toqyraýy bolyp, Soltústik jarty sharda astronomııalyq jaz bastalady.
Aıta keteıik, Reseılik ǵaryshker Balqash kóliniń ǵaryshtan túsirilgen sýretin jarııalady.