2-3 paıyzdyq baspana nesıeleri qashan beriledi

ASTANA. QazAqparat - Búgin «Nur Otan» partııasynyń kezekti XVIII sezinde Elbasy Nursultan Nazarbaev baspana alýǵa 2-3 paıyzdyq nesıeler júıesin engizýdi tapsyrdy. Atalǵan nesıeler tabysy tómen kópbalaly jáne tolyq emes otbasylar, sondaı-aq múgedek balalardy asyrap otyrǵan azamattarǵa beriledi, dep habarlaıdy QazAqparat tilshisi.

QR Premer-Mınıstriniń orynbasary - QR Qarjy mınıstri Álıhan Smaıylovtyń aıtýynsha, aldymen respýblıkalyq bıýdjetten Turǵyn úı qurylys jınaq bankine 50 mıllıard teńge bólinedi. Bank ol qarajatty basqa resýrstarmen birge jeńildetilgen nesıelerdi berýge jumsaıdy.

«Sáýir aıynda biz qarjylandyrýdy bastaımyz. Odan keıin Turǵyn úı qurylys jınaq banki nesıeniń jańa túrin tezdetip ázirlep, halyqqa usynýy qajet. Biraq bıyldan bastap 2-3 protsenttik nesıeler beriledi. Ol - anyq nárse», - dedi Á.Smaıylov jýrnalısterge bergen suhbatynda.

Aıta keteıik, búgin «Nur Otan» partııasynyń kezekti XVIII sezinde Elbasy Nursultan Nazarbaev tabysy tómen otbasylarǵa 2-3 protsentpen baspana satyl alý múmkindigin qarastyrýdy tapsyrdy.

«Tabysy tómen kópbalaly jáne tolyq emes otbasylarǵa, múgedek balalary bar, az qamtylǵan otbasylarǵa páter satyp alýdyń qoljetimdiligin arttyrý qajet. Bul sanattaǵy azamattarǵa Turǵyn úı qurylys jınaq júıesi arqyly jyldyq 2-3 paıyzben turǵyn úı zaemyn berý tetikterin ázirleýdi tapsyramyn. Ol úshin Turǵyn úı qurylys jınaq bankine qarajat qajet bolady jáne oǵan jyl saıyn 50 mlrd teńge bólýdi tapsyramyn»,- dedi N.Nazarbaev.