19 qańtar — Tárbıe qurylymdary ofıtserleriniń kúni
ASTANA. KAZINFORM — Búgin elimizde tárbıeshi ofıtserler kúni atap ótiledi. Bul — áskerı qyzmetshilerdiń moraldyq-psıhologııalyq jaı-kúıine jaýapty, patrıottyq sanany qalyptastyratyn kásibı mamandardyń merekesi, dep habarlaıdy Qorǵanys mınıstrliginiń baspasóz qyzmeti.
Sondaı-aq olar áskerı ujymdarda qolaıly ahýaldy qamtamasyz etetin jáne áskerı qyzmetshilerdiń quqyqtaryn qorǵaýmen aınalysady.
— Búgingi tańda Qazaqstan Qarýly kúshterinde Memleket basshysynyń tapsyrmalaryna sáıkes tárbıe jumysyn kúsheıtý jáne áskerı tártipti nyǵaıtý jónindegi keshendi sharalar júzege asyrylyp jatyr. Atalǵan tapsyrmalar aıasynda komandırlerdiń tárbıe jáne ıdeologııalyq jumys jónindegi orynbasarlary qyzmetindegi bes negizgi baǵyt aıqyndaldy. Onyń ishinde qaýipsizdik máselelerine, quqyq buzýshylyqtardyń aldyn alýǵa, áskerı qyzmetshilerdiń quqyqtaryn qorǵaýǵa jáne olardyń kásibı quzyretterin damytýǵa jaǵdaı jasaýǵa barynsha kóńil bólinip keledi, — delingen habarlamada.
Áskerdiń qoǵamǵa ashyqtyǵy da birtindep kúsheıtilip keledi. Depýtattardyń, Bas redaktorlar klýby ókilderiniń jáne «Analar júregi» sarbaz analary komıtetiniń qatysýymen aqparattyq-túsindirý is-sharalarynyń kesheni júzege asyrylyp jatyr.
Aldyn alý jáne psıhologııalyq qoldaýdyń kópdeńgeıli júıesi qalyptasty. Zamanaýı dıagnostıkalyq ádister men tsıfrlyq monıtorıng quraldary qoldanylyp, áskerı psıhologtardyń daıarlyq deńgeıi arttyryldy. Áskerı qyzmetshiler men olardyń otbasy músheleriniń densaýlyǵyn qorǵaý jáne medıtsınalyq kómektiń sapasyn jaqsartý boıynsha qosymsha sharalar qabyldandy.
Jastardy áskerı-patrıottyq tárbıeleýdi damytý baǵytynda júıeli jumys júrgiziledi. Normatıvtik-quqyqtyq baza jańartylyp, óńirlerde mektep oqýshylarymen, stýdenttermen jáne eńbek ujymdarymen kezdesýler ótkizetin kóshpeli aqparattyq-nasıhattyq toptar uıymdastyrylǵan.
Áskerı qyzmettiń qaýipsizdigin arttyrý maqsatynda táýekelderdi monıtorıngileýdiń tsıfrlyq júıeleri men zamanaýı keri baılanys arnalary engizildi. Senim telefondary, «AIsulu» Telegram-boty, sondaı-aq merzimdi áskerı qyzmet sarbazdary jaqyndarymen baılanysý úshin apta saıyn paıdalanatyn «Otbasymen beıneqońyraý» servısi jumys isteıdi.
Júzege asyrylyp jatqan barlyq bastamanyń artynda tárbıeshi ofıtserler tur. Olardyń úlesi tek moraldyq rýhty qoldaýǵa ǵana emes, sonymen qatar armııanyń tártibi men jaýyngerlik ázirligin nyǵaıtýǵa baǵyttalǵan.
Budan buryn Qorǵanys mınıstriniń orynbasary Qanysh Ábýbákirov áskerden jaltarǵandarǵa qatysty pikir aıtty.