18 jeltoqsan. Tulǵalar týǵan kún
18 jeltoqsanda tulǵalardan kimder dúnıege kelgen? Kazinform oqyrmandaryna esimder kúntizbesin usynady.
ESІMDER
79 jyl buryn (1944) memleket jáne qoǵam qaıratkeri, Qazaqstan Respýblıkasy Parlament Senaty janyndaǵy senatorlar keńesiniń múshesi Oralbaı Ábdikárimuly ÁBDІKÁRІMOV dúnıege keldi.
Qaraǵandy oblysy Nura aýdanynda týǵan. Qaraǵandy memlekettik ýnıversıtetin, Almaty joǵary partııa mektebin bitirgen. Qaraǵandy qalalyq halyqtyq baqylaý komıtetinde, partııa organdarynda, respýblıkalyq basqarý organdarynda memlekettik qyzmette bolyp, Prezıdent Apparaty basshysynyń orynbasary – uıymdastyrý-baqylaý bóliminiń meńgerýshisi, QR Prezıdenti Ákimshiliginiń basshysy, QR Joǵary tártiptik keńesiniń tóraǵasy, sybaılas jemqorlyqpen kúres jónindegi Memlekettik komıssııanyń tóraǵasy, QR Memlekettik hatshysy, QR Prezıdentiniń keńesshisi bolyp qyzmet istegen. QR Joǵarǵy Keńesiniń on ekinshi shaqyrylymynyń depýtaty. 1999 jylǵy qarashada QR Prezıdentiniń Jarlyǵymen QR Parlamentiniń ekinshi shaqyrylymynda Senat depýtaty bolyp taǵaıyndalǵan. QR Parlamenti Senatynyń Tóraǵasy bolyp saılanǵan. «Nur Otan» partııasynyń Sybaılas jemqorlyqpen kúres jónindegi qoǵamdyq keńesi tóraǵasynyń orynbasary.
II dárejeli «Barys» (2001), І dárejeli «Barys» (2009) TMD PAA-nyń «Sodrýjestvo» ordenderimen, medaldarmen marapattalǵan.
68 jyl buryn (1955) tanymal qoǵam qaıratkeri, dıplomat Almaz Násireddınuly HAMZAEV dúnıege keldi.
Taraz qalasynda týǵan. 1977 jyly Almaty qalasyndaǵy shet tilderi pedogogıkalyq ınstıtýtyn bitirgen, aǵylshyn tiliniń muǵalimi. 1990 jyly KSRO SІM Dıplomatııalyq akademııasyn bitirgen.
AQSh, Ulybrıtanııa, Italııa, Grekııa, Malta, San-Marıno jáne Belgııa sııaqty kóptegen memleketterde Qazaqstannyń Tótenshe jáne Ókiletti Elshisi, Elshiniń keńesshisi sııaqty jaýapty qyzmetter atqarǵan. 2012 jyldyń 28 qarashasynan bastap – Qazaqstannyń Lıýksembýrgtegi Tótenshe jáne Ókiletti Elshisi, sonymen qatar NATO jáne Eýropalyq Odaqtaǵy Qazaqstan Respýblıkasy ókildiginiń basshysy. 2018 jyldan bastap – QR Syrtqy ister mınıstrliginiń erekshe tapsyrmalar jónindegi Elshisi.
«Qurmet» (2008) ordenimen, «Astana» (1998), «Qazaqstan Respýblıkasynyń táýelsizdigine 10 jyl» (2001), «Eren eńbegi úshin» (2002), «Qazaqstan Konstıtýtsııasyna 10 jyl» (2005), «Qazaqstan Parlamentine 10 jyl» (2006), «Astananyń 10 jyldyǵy» (2008) medaldarimen, QR Prezıdentiniń alǵys hatymen (2005, 2010), syrtqy saıasatqa qosqan úlesi úshin «Názir Tórequlov» medalimen, «Altyn barys» ordenimen marapattalǵan.
59 jyl buryn (1964) Qazaqstannyń Italııa Respýblıkasyndaǵy, Malta Respýblıkasyndaǵy, San-Marıno Respýblıkasyndaǵy Tótenshe jáne Ókiletti Elshisi Erbolat Násenuly SEMBAEV dúnıege keldi.
Shyǵys Qazaqstan oblysynda týǵan. Qazaq ulttyq tehnıkalyq ýnıversıtetin, (1987); Mılan qalasyndaǵy Enrıko Matteı orta mektebin (1996) bitirgen.
Eńbek joly: 1998-2001 jyldary kópjaqty yntymaqtastyq bóliminde, EQYU departamentinde jáne Eýropa departamentinde ártúrli laýazymdarda jumys istedi; 2001-2009 jyldary Qazaqstan Respýblıkasynyń Italııa Respýblıkasyndaǵy Elshiliginiń birinshi hatshysy, keńesshisi, keńesshisi-elshisi; 2013-2015 jyldary Syrtqy ister mınıstrligi Kópjaqty yntymaqtastyq departamentiniń dırektory; 2016-2017 jyldary QR Syrtqy ister mınıstrliginiń Erekshe tapsyrmalar jónindegi Elshisi; 2018-2021 jyldary Qazaqstan Respýblıkasynyń Belgııadaǵy Elshiliginiń Mınıstrdiń keńesshisi, Eýropalyq Odaqtaǵy ókildigi basshysynyń orynbasary. Qazirgi qyzmetin 2021 jyldan beri atqaryp keledi.
51 jyl buryn (1972) Qazaqstan Respýblıkasynyń Premer-mınıstri Álıhan Ashanuly SMAIYLOV dúnıege keldi.
Almaty qalasynda týǵan. 1994 jyly Ál-Farabı atyndaǵy Qazaq memlekettik ulttyq ýnıversıtetin qoldanbaly matematıka mamandyǵy boıynsha bitirdi. 1996 jyly Qazaqstan Respýblıkasy Prezıdenti janyndaǵy Qazaq menedjment, ekonomıka jáne boljaý ınstıtýtyn tamamdap, memlekettik basqarý magıstri dárejesin alǵan.
1993-1995 jyldary «A-Invest» ınvestıtsııalyq-jekeshelendirý qorynyń bas mamany, 1996-1998 jyldary – QR Ulttyq statıstıka agenttiginiń basqarma bastyǵynyń orynbasary, basqarma bastyǵy, 1998 jyly QR Statıstıkalyq josparlaý jáne reformalar agenttiginiń Statıstıka jáne taldaý komıteti tóraǵasynyń orynbasary, 1998-1999 jyldary QR Prezıdenti Ákimshiliginde bas sarapshy, sektor meńgerýshisi, memlekettik ınspektor qyzmetin atqardy.
1999-2003 jyldary QR Statıstıtka agenttiginiń tóraǵasy, 2003 jylǵy aqpan men shilde aralyǵynda – QR Syrtqy ister vıtse-mınıstri, 2003-2006 jyldary «Eksporttyq kredıtter men ınvestıtsııalardy saqtandyrý jónindegi memlekettik saqtandyrý kompanııasy» AQ basqarmasynyń tóraǵasy laýazymdaryn atqardy. 2006-2007 jyldary QR Qarjy vıtse-mınıstri, 2007-2008 jyldary «QazAgro» Ulttyq holdıngi» AQ prezıdenti, 2008-2009 jyldary QR Qarjy vıtse-mınıstri, 2009-2014 jyldary QR Statıstıka agenttiginiń tóraǵasy, 2014-2015 jyldary QR Ulttyq ekonomıka mınıstrliginiń Statıstıka komıtetiniń tóraǵasy qyzmetinde.
2015 jylǵy jeltoqsanda Memleket basshysynyń Jarlyǵymen QR Prezıdentiniń kómekshisi bolyp taǵaıyndaldy. 2019-2020 jyldary QR Premer-mınıstriniń birinshi orynbasary – QR Qarjy mınıstri, 2020-2022 jyldary – QR Premer-Mınıstriniń birinshi orynbasary qyzmetin atqarǵan. Qazirgi qyzmetin 2022 jyldyń qańtarynan beri atqaryp keledi.
«Qurmet» ordenimen, «Eren eńbegi úshin», «Qazaqstan táýelsizdigine 10 jyl», «Qazaqstan Konstıtýtsııasyna 10 jyl», «Astanaǵa 10 jyl» medaldarymen marapattalǵan. «1 rangty keńesshi» dıplomatııalyq rangy bar.
46 jyl buryn (1977) telejúrgizýshi, prodıýser, medıa-menedjer, tanymal jýrnalıst Láılá Sultanqyzy SEŃGІRBEKOVA dúnıege keldi.
Shymkent qalasynda týǵan. Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin támamdaǵan.
Eńbek jolyn 1999 jyly «Shahar» telearnasynyń prodıýseri bolyp bastap, «Hit TV»arnasynda dırektor, «Qazaqstan» RTRK AQ prodıýser laýazymdarymen jalǵastyrdy. «KazMedia Mobile» JShS bas dırektory, «Kıno+Serıal» baspasynyń bas redaktory. 2017 jylǵa deıin «Qazaqstan» ulttyq arnasyndaǵy «Áıel baqyty» tok-shoýynyń avtory jáne júrgizýshisi, «Balapan» telearnasynyń dırektory boldy. «Jibek Joly» telearnasyndaǵy «Suhbat. Láılá Sultanqyzymen» baǵdarlamasynyń avtory ári júrgizýshisi.
39 jyl buryn (1984) Qazaqstan Respýblıkasy Parlamenti Senatynyń depýtaty Álisher Ǵapirjanuly SATYBALDIEV dúnıege keldi.
Ońtústik Qazaqstan oblysy, Saıram aýdany, Saıram aýylynda týǵan. 2007 jyly M.Áýezov atyndaǵy Ońtústik Qazaqstan memlekettik ýnıversıtetin «Tarıh, quqyq jáne ekonomıka negizderi» mamandyǵy boıynsha, 2015 jyly «Mıras» ýnıversıtetin zańger mamandyǵy boıynsha bitirgen.
Eńbek joly: 2007-2016 jyldary «Nur Otan» partııasy Saıram aýdandyq fılıalynyń esep jáne statıstıka sektorynyń meńgerýshisi – bas esepshi, 2016-2023 jyldary «Janýbıı Qozoǵıston» qoǵamdyq-saıası gazetiniń bas redaktory-dırektory.
2023 jyldyń qańtar aıynan bastap qazirgi qyzmetinde. «Qazaqstan halqy Assambleıasyna 25 jyl», «Meıirim» , «Qazaqstan Respýblıkasynyń Táýelsizdigine 30 jyl» medaldarymen marapattalǵan.
