13-shi jalaqy qandaı jaǵdaıda tólenedi

ASTANA. KAZINFORM – Qazaqstanda qyzmetkerlerge syıaqy jáne on úshinshi jalaqy tóleý máselesin Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıtetiniń tóraǵasy Meırambek Ahmetov túsindirip berdi. 

- Syıaqy men basqa da ústemaqy tóleý tártibi ujymdyq nemese jeke eńbek shartynda naqty jazylýy tıis. Eger eńbek shartynda qarastyrylmaǵan jaǵdaıdyń ózinde qyzmetkerler syıaqy nemese 13-shi jalaqy tóleýdi surap júgine alady. Alaıda, basshylyqtyń bas tartýǵa quqyǵy bar. Qyzmetkerler basshylyqtan talap ete alady, biraq oǵan basshylyq bara ma? Uıymnyń mundaı qarjylyq múmkindigi bar ma, másele osynda, - dedi Meırambek Ahmetov ortalyq kommýnıkatsııalar qyzmeti alańynda ótken baspasóz máslıhatynda. 

Sondaı-aq eńbek ınspektsııasy komıtetiniń basshysy syıaqy máselesine qatysty bólek jaýap berdi. 

- Eńbek daýynyń basym bóligi dál osy syıaqy tóleý máselesi boıynsha týyndaıdy. Qyzmetkerler basshylyqtan jyl sońyna nemese belgili bir merekege tóleńizder dep suraıdy. Al kásiporyn ákimshiliginde ondaı qarajat joq, bıýdjette qarastyrylmaǵan nemese múldem bolmaıdy. Osydan eńbek daýy shyǵyp jatady – deıdi ol. 

Aıta keteıik, búginde elimizde 95 kásiporynda eńbek daýy qaralyp jatyr.