116 jastaǵy keıýana referendýmda daýys berdi
JEZQAZǴAN. KAZINFORM - Ulytaý oblysynda respýblıkalyq referendýmǵa túrli býyn ókilderi belsendi qatysyp jatyr. Solardyń qatarynda elimizdegi eń qart turǵyndardyń biri de óz tańdaýyn jasap, azamattyq ustanymyn bildirdi.
Ulytaý oblysynda ótip jatqan respýblıkalyq referendým barysynda aǵa býyn ókilderi de el bolashaǵyna beıjaı qaramaı, qoǵamdyq-saıası naýqanǵa belsene atsalysyp jatyr. Sonyń aıqyn dáleli – Jańaarqa aýdanynyń turǵyny, 116 jastaǵy Túımegúl Temirbaeva.
Qyzyljar kentinde turatyn qarııa referendýmda daýys berip, óz azamattyq tańdaýyn jasady. Onyń jasy men densaýlyq jaǵdaıyn eskergen ýchaskelik referendým komıssııasynyń músheleri arnaıy jyljymaly daýys berý jáshigin keıýananyń úıine aparyp, daýys berý múmkindigin uıymdastyrdy.
Túımegúl Temirbaeva 1910 jyly dúnıege kelgen. Bıyl qańtar aıynda ol 116 jasqa tolyp, Qazaqstandaǵy eń jasy úlken turǵyndardyń biri atandy. Qazirgi tańda ol Ulytaý oblysy Jańaarqa aýdanyna qarasty Qyzyljar kentinde turady.
Túımegúl áje búkil ómirin otbasy tárbıesine arnaǵan jan. Onyń aıtýynsha, uzaq ǵumyr súrýdiń basty syry – adal eńbek pen týǵan-týysqa degen shynaıy súıispenshilik. Búginde keıýananyń 15 nemeresi men 25 shóberesi bar. Ol árdaıym otbasynyń berekesin saqtap, balalary men nemerelerine úlgi bolyp keledi.
Jaqyndarynyń sózinshe, Túımegúl áje densaýlyǵyna jıi shaǵymdanbaıdy. Qartaıǵanyna qaramastan, belsendi ómir saltyn ustanyp, otbasy múshelerimen birge túrli otbasylyq is-sharalarǵa qatysyp turady.
Osylaısha, ǵasyrdan asqan ulytaýlyq keıýana mańyzdy saıası naýqannan shet qalmaı, el bolashaǵyna qatysty sheshim qabyldaý isine óz úlesin qosty.
Aıta keteıik, Ulytaý oblysynda respýblıkalyq referendýmǵa turǵyndardyń qatysý belsendiligi joǵary deńgeıde jalǵasyp jatyr.