11 oblysta áli de órt qaýipi bar - Qazgıdromet

ASTANA. KAZINFORM – «Qazgıdromet» RMK-sy tamyzdyń 15-i kúngi kún raıy boljamyn jarııalady.

Kásiporynnyń derekterine qaraǵanda, soltústik-batys tsıklony jáne onymen baılanysty atmosferalyq aǵyndardyń saldarynan elimizdiń batysynda, soltústiginde, shyǵysynda jáne eldiń ortalyǵynda naızaǵaı oınap, jańbyr jaýady.

Qazaqstannyń soltústiginde burshaq jaýyp, daýyl turady, jańbyr jaýady. Antıtsıklon sileminiń áserinen respýblıkanyń ońtústiginde ǵana kún jaýyn-shashynsyz bolady. Respýblıka boıynsha jel kúsheıedi túnde jáne tańerteń soltústikte tuman túsip, kúndiz eldiń ońtústiginde shańdy daýyl turady.

Almaty oblysynda, Jetisý oblysynda, Atyraý oblysynyń batysynda, Batys Qazaqstan oblysynyń soltústiginde, ońtústiginde, Qyzylorda oblysynyń ortalyǵynda, ońtústiginde, Jambyl oblysynyń ortalyǵynda, Abaı oblysynyń soltústik-batysynda, Shyǵys Qazaqstan oblysynyń ońtústiginde, Ulytaý oblysynyń ortalyǵynda, batysynda, Mańǵystaý oblysynyń ortalyǵynda, Pavlodar oblysynyń ońtústik-shyǵysynda órt qaýpi joǵary bolady dep kútilýde.

Túrkistan, Qyzylorda oblystarynda, Batys Qazaqstan oblysynyń batysynda, soltústiginde, ońtústiginde, Mańǵystaý oblysynyń ortalyǵynda, Almatynyń batysynda, soltústiginde, shyǵysynda, Jambyl oblysynyń soltústiginde, batysynda, shyǵysynda, Atyraý oblysynyń ońtústiginde, shyǵysynda, Qostanaı oblysynyń ońtústiginde, Aqtóbe, Qaraǵandy oblystarynyń ońtústiginde, Ulytaý jáne Abaı oblystarynyń ońtústiginde tótenshe órt qaýpi kútiledi.

Skandınavııanyń soltústigindegi aptap ystyq adam áreketinen kúsheıe túskeni týraly jazdyq.