11 qańtar. Jylnama
Kazinform oqyrman nazaryna 11 qańtarǵa arnalǵan ataýly kúnder men este qalar oqıǵalar kúntizbesin usynady.
ATAÝLY KÚNDER
Búkilálemdik «Rahmet» kúni
11 qańtar – jyldyń eń «ádepti» kúni. Ol búkilálemdik rahmet kúni retinde atalyp ótedi. BUU men ıÝNESKO-nyń bastamasymen paıda bolǵan ataýly kúnniń ózindik maǵynasy mol, óıtkeni bul kúndi azamattyǵyna, ultyna, dinı senimine qaramastan búkil álem bolyp atap óte alady.
ESTE QALAR OQIǴALAR
2006 jyly 2005 jyldyń 4 jeltoqsanynda ótken saılaýda Qazaqstan Respýblıkasynyń Prezıdenti bolyp qaıta saılanǵan Nursultan Nazarbaevty ulyqtaý rásimi boldy.
Saltanatty rásimge 7 memleket prezıdenti, álemniń 20-dan astam memleketiniń úkimet jáne parlament basshylary, Birikken Ulttar Uıymy, Shanhaı yntymaqtastyq uıymy, Eýropa odaǵy halyqaralyq uıymdardyń ókilderi qatysty.
2006 jyly «Aqorda» rezıdentsııasynda Qazaqstan Prezıdentiniń ulyqtaý rásiminde «Meniń Qazaqstanym» áni Qazaqstan Respýblıkasynyń Memlekettik Gımni retinde alǵash ret oryndaldy.
2011 jyly rejısser Bolat Sháripovtiń qazaqtyń tuńǵysh kásibı dıplomaty Názir Tórequlovqa arnalǵan «Ókiletti elshi» derekti fılmi túsirildi. Názir Tórequlov KSRO-nyń musylman álemi elderindegi alǵashqy elshisi boldy.
2013 jyly Astana tsırkiniń gımnasshylary Darııa Ábdihasova men Dana Ryspekova halyq arasynda «Tsırktegi Oskar» dep atalatyn syılyq – «Altyn kloýn» festıvaliniń gran-prıin jeńip aldy. Gollandııanyń Enhed qalasynda ótken festıvalda qyzdar álemniń úzdik tsırk ártisteriniń arasynan top jardy.
2013 jyly Qazaqstan jas kınematografısteriniń qatysýymen «ABAI 45» aýdıokitaby shyǵaryldy. Bul – Abaıdyń «Qara sózderiniń» orys tilindegi aýdıonusqasy.
2016 jyly QR Qarýly Kúshterinde jańa qyzmet – gıdrometeorologııalyq qyzmet paıda boldy. Gıdrometeorolog áskerı qyzmetshiler Qarýly kúshterdiń gıdrometeorologııalyq bólimsheleriniń jasaqtalýyn baqylaıdy, meteorologııalyq málimetti jınaıdy, taldaıdy jáne áskerlerge taratady. Avıatsııalyq oqıǵalardy, teńizde júzý jáne keme qatynasynyń qaqtyǵystary men qaýipsizdigin tergep-tekserýge qatysady, sondaı-aq QR QK-niń gıdrometeorologııalyq bólimshelerinde ǵylymı-ádistemelik jáne ónertapqysh jumysty júrgizedi.
2017 jyly QR Prezıdenti Ákimshiliginiń basshysy jetekshilik etetin bılik tarmaqtary arasynda ókilettikterdi qaıta bólý máseleleri boıynsha jumys toby quryldy. Onyń quramyna QR Parlamentiniń, Úkimetiniń, Joǵarǵy sottyń, basqa da memlekettik organdardyń ókilderi, sondaı-aq zań jáne ǵylymı-sarapshylyq qoǵamdastyqtyń ókilderi kirdi.
2017 jyly Qazaqstan maýsymdyq tumaýǵa qarsy ekpe jasap shyǵardy.
2017 jyly Shyǵys Qazaqstan oblysynan shyqqan shahmatshy Aleksandr Kochergın júz torkózdi shahmatty oılap tapty. Ol oıynǵa jańa fıgýralardy: hanzada men hanshany engizip, oıyn erejesin kúrdeli ete tústi.
2019 jyly Jansaıa Ábdimálik shahmattyń barlyq túrinen 20 jasqa deıingiler arasynda álem reıtınginde kósh bastady. Qazaqstandyq shahmatshy klassıkadaǵy ELO, rapıd jáne blıts boıynsha aldyńǵy orynda.
Buǵan deıin bir de bir qazaqstandyq shahmatshy bir ýaqytta oıynnyń úsh túrinen álemdik reıtıngti baǵyndyra almaǵan.
