10 jylda alǵash ret Qarakól jáne Sulýkólge sý jiberildi

ASTANA. KAZINFORM — Sońǵy 10 jylda alǵash ret Sý resýrstary jáne ırrıgatsııa mınıstrligi Talas ózeniniń tómengi aǵysyndaǵy Qarakól kólin toltyrdy, dep habarlaıdy vedomstvonyń baspasóz qyzmeti.

Sýdyń durys ári tıimdi bólinýiniń arqasynda Talas ózenindegi «Oıyq» gıdrotoraby arqyly júrgizilgen ekologııalyq maqsatta sý jiberý nátıjesinde Jambyl oblysyndaǵy «Qazsýshar» fılıaly Qarakól kóline sý toltyryp, Sulýkól kóline de sý jetkize aldy. Sonymen qatar Sarysý jáne Talas aýdandaryndaǵy tabıǵı jaıylymdarǵa da sý bardy.

Jergilikti ekojúıeni saqtaý jumystary sýarý maýsymy bastalmaı turyp júrgizildi. Bastapqyda osy maqsatqa «Oıyq» gıdrotoraby arqyly 120 mln tekshe metr sý jiberý josparlanǵan edi. Alaıda sáýir aıynyń ortasyna qaraı ekologııalyq maqsatta sý jiberýdiń jalpy kólemi 315 mln tekshe metrge jetti.

30 mamyr kúni Sý resýrstary jáne ırrıgatsııa mınıstri Nurjan Nurjigitovtiń tapsyrmasy boıynsha Jambyl oblysyndaǵy «Qazsýshar» fılıalynyń mamandary arnaıy tekseris júrgizip, Talas ózeni arqyly jiberilgen sýdyń Sarysý jáne Talas aýdandaryna jetkenine kóz jetkizdi.

Óz kezeginde jergilikti turǵyndar atqarylǵan jumys úshin Sý resýrstary jáne ırrıgatsııa mınıstrligine alǵys bildirip jatyr.

— Bıyl aldyńǵy jyldarǵa qaraǵanda sý qarqyndy keldi. Sý negizgi arnamen ótip, jaıylymdy jerlerge jaıyldy. «Qazsýsharǵa» rızamyz, sonyń jumysynyń nátıjesinde sý jaqsy keldi. Osyndaı kólemde sý jyl saıyn kelip turady dep úmittenemiz, — deıdi Shaǵalaly eldi mekeniniń turǵyny Ońlyáshim Dúısenbekov.

Osydan buryn Sý resýrstarynyń ulttyq aqparattyq júıesiniń tórt modýli pılottyq rejımde iske qosylǵany habarlandy.