10 aıda óńdeý ónerkásibinde 24 trln teńgeniń ónimi shyǵaryldy

ASTANA. KAZINFORM — Bıyl 10 aıda óńdeý ónerkásibinde 24 trln teńgeniń ónimi shyǵaryldy. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty. 

— Óńdeý ónerkásibinde sońǵy jyldary qalyptasqan oń damý dınamıkasy bıyl da óz jalǵasyn taýyp jatyr. 10 aıdyń qorytyndysy boıynsha metallýrgııa, mashına jasaý, hımııa ónerkásibi, sondaı-aq qurylys materıaldar óndirisinde oń dınamıka esebinen óndiris kólemi 24 trln teńgeden asyp, 5,8 paıyzǵa ósti. Óńdeý kólemine iske qosylǵan jobalar óz úlesin qosyp jatyr. Bıylǵa josparlanǵan jalpy quny 1,5 trln teńge bolatyn 190 jobanyń 147-i iske qosyldy. Nátıjesinde 18 myńnan astam jumys orny quryldy, — dedi mınıstr.

Onyń aıtýynsha, iske qosylǵan jobalardyń qatarynda qytaılyq Chery, Changan, Haval, Tank brendteriniń jeńil avtokólikterin shyǵaratyn, tamaq ónerkásibine arnalǵan alıýmınııden jasalǵan qaptamalar, turmystyq tehnıka, bolat qubyrlar jáne toqyma materıaldaryn óndiretin iri jobalar bar.

— Atalǵan jobalar tolyq óndiristik qýatyna shyqqan kezde óńdeý kólemi jylyna qosymsha 2,3 trln teńgege artady. Búginde salany damytý kelesi negizgi baǵyttar boıynsha júzege asyrylyp jatyr. Olar — qarjynyń qoljetimdiligi; shıkizatty jeńildetilgen baǵamen qamtamasyz etý; ónerkásiptik ınfraqurylym tartý jáne ónim ótkizýdi qoldaý, — dedi Ersaıyn Naǵaspaev.

Aıta keteıik, Úkimet otyrysynda óńdeý ónerkásibin damytý jáne tsıfrlandyrý máselesi qaralyp jatyr.