10 aqpan. Jylnama
Kazinform oqyrman nazaryna 10 aqpanǵa arnalǵan ataýly kúnder men este qalar oqıǵalar kúntizbesin usynady.
Dúnıejúzilik dándi-burshaqty daqyldar kúni
2013 jyly BUU Bas assambleıasy dándi-burshaqty daqyldardyń mańyzdylyǵyna nazar aýdartý jáne ony damytý maqsattaryna qol jetkizý úshin 2016 jyldy burshaq daqyldylar jyly dep jarııalady. Ony sátti ótkizgennen keıin Býrkın-Faso delegatsııasy Dúnıejúzilik dándi-burshaqty daqyldar kúnin bekitý týraly usynys aıtty. Bul bastama qoldaý taýyp, 2018 jyldyń 20 jeltoqsanynda Bas assambleıa rezolıýtsııa qabyldady. Dúnıejúzilik dándi-burshaqty daqyldar kúniniń basty mindeti – dándi-burshaqty daqyldardyń qorektik qundylyǵymen tanystyrý, sonymen qatar turaqty damý maqsatyna jetý úshin dándi-burshaqty daqyldardyń mańyzdylyǵyn túsindirý.
Pýshkındi eske alý kúni
E. Dantespen dýelden keıin qaza bolǵan uly orys aqynyn eske alý kúni. Dantespen dýel Sankt-Peterbordyń irgesindegi Qara ózende ótken. Osy kúni aqynnyń jeke sýretteriniń, otbasylyq albomynyń, klassıkti beınelegen sýretshilerdiń kartınalarynyń kórmeleri ótedi. Máskeýdegi A.S.Pýshkın atyndaǵy memlekettik beıneleý óneri mýzeıi men onyń fılıaldary kelem deýshilerdi kórmege shaqyrady. Sankt-Peterborda aqyndy eske alý saltanaty ol turǵan úıdiń aýlasynan bastalady. A.S. Pýshkın Dantespen bolǵan dýel kezinde alǵan jaraqatynan 1837 jyly 10 aqpanda 37 jasynda kóz jumdy.
ESTE QALAR OQIǴALAR
1934 jyly shahterler ortalyǵy – Qaraǵandy qala mártebesin resmı túrde aldy.
1993 jyly Reseıdiń Qorǵan oblysynda turatyn qazaqtardyń quryltaıy ótti. Quryltaıdyń arnaıy sheshimimen «Shańyraq» atty Qorǵan qazaqtarynyń mádenı ortalyǵy quryldy.
1995 jyly Almatyda ótken TMD elderi Memleket basshylarynyń Keńesi men Úkimet basshylary keńesiniń májilisinde ujymdyq qaýipsizdik, TMD shekara jáne bitimgershilik kúshterin qurý týraly másele talqylandy. Táýelsiz Memleketter Dostastyǵynda beıbitshilik pen turaqtylyqqa qoldaý kórsetý týraly memorandým qabyldandy.
2000 jyly QR Prezıdentiniń Jarlyǵymen Qazaqstannyń áskerı doktrınasy bekitildi.
2000 jyly QR Úkimeti «Astana qalasyn damytýdyń bas jospary týraly» Qaýly qabyldady.
2002 jyly Qazaqstannyń atom ónerkásibiniń ǵylymı, tehnıkalyq, tehnologııalyq, bilim berý problemalary men qorshaǵan orta problemalaryn sheshý maqsatynda «Qazatomónerkásip» Ulttyq atom kompanııasynyń enshiles kásiporny – Joǵary tehnologııalar ınstıtýty quryldy.
2006 jyly Almatyda Muqaǵalı Maqataev atyndaǵy respýblıkalyq qoǵamdyq qor quryldy. Qordyń aldyna qoıǵan negizgi maqsaty – aqyn týraly estelikterdi jaryqqa shyǵaryp, jas muqaǵalıtanýshylardy jurtshylyqqa tanytý. Sondaı-aq aqyn shyǵarmalaryn shet tilderine aýdarý.
2008 jyly Óskemende Dáýlet Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń bazasynda nanotehnologııalar men elektrondy mıkroskopııalar jónindegi japon-qazaqstan ǵylymı-zertteý oqý ortalyǵy quryldy. Halyqaralyq ortalyqtyń qurylýy Qazaqstanda eń serpindi jobalardy júzege asyrý úshin ınjenerlik baǵyttaǵy zerthanalar jelisin qurýdyń prezıdenttik baǵdarlamasyn damytýdaǵy mańyzdy qadam bolyp otyr. Ken-metallýrgııa ónerkásibi resýrstaryn keshendi paıdalaný negizinde jańa materıaldar alýdyń joǵary tehnologııalar baǵyty boıynsha jumys isteıtin «ІRGETAS» ınjenerlik zerthanasynda zamanaýı jabdyqtardy qurastyrý úshin óńirge japondyq «Interactive Corporation» kompanııasynyń ókilderi keldi.
2014 jyly QR Prezıdenti janyndaǵy Memlekettik basqarý akademııasy «A» korpýsynyń memlekettik qyzmetkerlerin qashyqtyqtan onlaın oqytý» ınnovatsııalyq jobasyn iske qosty.
2015 jyly Mańǵystaý oblysynyń Beıneý aýdanynda 1966 jyly ashylǵan «Shaǵyrly-Shómishti» jańa ken orny paıdalanýǵa berildi. Ken ornyndaǵy gazdyń jalpy qory 32,4 mlrd tekshe metrdi quraıdy.
2018 jyly óskemendik sýretshi Anastasııa Sachenok Japonııanyń Osaka qalasyndaǵy Moneta saraıy ótkizetin halyqaralyq konkýrsta jeńiske jetti. Konkýrs sharttary boıynsha, qazylar alqasyna tarıh, tehnıkalyq órkendeý jáne ekologııa taqyryptary beınelengen monetanyń elektrondy eskızi men gravırlengen úlgisi usynylýy tıis boldy. Anastasııa Sachenok jáne onyń áriptesteri Dıdar men Erǵalı usynǵan moneta úzdik dep tanyldy.
2019 jyly Qazaqstannyń shańǵy jarystary komandasynyń kóshbasshysy Alekseı Poltoranın Slovenııanyń Planıtsa qalasynda ótken Alpi kýbogynda altyn medal jeńip aldy. Qazaqstandyq shańǵyshy klassıkalyq júrispen 15 qashyqtyqta jeńiske qol jetkizdi. Poltoranın márege 36:3.0 ýaqytta jetti.
2021 jyly elordanyń QR Ulttyq mýzeıinde QR Mádenıet qaıratkeri, qazaqtyń kórnekti aqyny Marfýǵa Bektemirovanyń (1958-2013j.j.) «Tańdamaly shyǵarmalar» kitabynyń tusaýkeseri jáne jeke zattarynyń mýzeı qoryna tapsyrylý rásimi ótti.
2023 jyly «Astana Balet» teatrynda danııalyq jazýshy Gans Hrıstıan Andersenniń qalyń kópshilikke tanys ertegisi boıynsha qoıylǵan «Qar patshaıymy» baleti kórsetildi. Qoıylym Elmar Bóribaevtyń jetekshiligindegi sımfonııalyq orkestrdiń súıemeldeýimen ótti.
